Wararka24: Ciidamada Mareykanka iyo kuwa Iiraan ayaa isku weeraraya Bariga Dhexe, kadib markii Taliska Dhexe ee Mareykanka ee CENTCOM uu sheegay inuu fuliyay duqeymo is-difaacid ah oo ka dhan ah saldhigyada Iiraan ee Jasiiradda Qeshm ee Marinka Hormuz.
Mareykanka ayaa xaqiijiyay inuu soo riday gantaallo ballistic ah iyo diyaarado aan duuliye lahayn oo Iiraan ay ku beegsanaysay maraakiibta iyo dalalka Khaliijka.
Tehran ayaa dhankeeda sheegtay inay gantaallo ku garaacday saldhigyo iyo diyaarado qumaatiga u kaca oo Mareykanku leeyahay, iyadoo ku tilmaantay tallaabo aargoosi ah. CENTCOM ayaa sheegtay in gantaallada Iiraan ay ku ridday waddamada Kuwait iyo Baxrayn qaarkood hawada lagu gubay, halka kuwo kalena ay ku dhaceen meel ka baxsan bartilmaameedkooda.
Sidoo kale, guuldarrada wadahadallada xabbad-joojinta ee dhammaadkii usbuuca ayaa sababay inay dib u soo labakleyso xiisaddan milatari.
Dhinaca kale, ciidamada badda ee Mareykanka ayaa gantaal nooca Hellfire ah ku dhuftay markab shidaal oo laga leeyahay dalka Botswana, kaasi oo iska dhegatiray digniino isdaba joog ah. Weerarkan ayaa qeyb ka ah go’doomin adag oo Washington ay ka waddo Marinka Hormuz, halkaas oo ay ku joojisay maraakiib dhowr ah oo ku sii jeeday dalka Iiraan.
Afhayeenka Wasaaradda Arrimaha Dibadda ee Iiraan, Esmail Baghaei, ayaa beeniyay dalabyada cusub ee ka yimid dhanka Mareykanka ee ku saabsan barnaamijkooda nukliyeerka.
Dhanka kale, Xoghayaha Arrimaha Dibadda ee Mareykanka, Marco Rubio, oo ka hor hadlayay Kongareeska, ayaa sheegay inaan Iiraan loo ballanqaadin in cunaqabateynta laga qaadayo ilaa ay ka fuliso shuruudaha adag ee horyaalla, isagoo ku adkeystay in xaaladda hadda taagan si dhow loo maamulo.
