Wararka24: Dowladda Federaalka Soomaaliya ayaa cambaaraysay weerarro gantaallo iyo diyaarado aan duuliye lahayn oo lagu bartilmaameedsaday Kuwait, iyadoo muujisay taageeradeeda iyo garab istaaggeeda dowladda iyo shacabka dalkaasi.
Bayaan ay soo saartay Wasaaradda Arrimaha Dibadda Soomaaliya ayaa lagu sheegay in dowladda ay si buuxda u taageersan tahay madaxbannaanida, amniga iyo xasilloonida Kuwait. Dowladda ayaa weerarradaasi ku tilmaantay kuwo khatar ku ah nabadda iyo amniga gobolka.
Soomaaliya ayaa sidoo kale adkaysay muhiimadda ay leedahay in la ixtiraamo sharciga caalamiga ah iyo mabaadi’da ku cad Axdiga Qaramada Midoobay. Bayaanka ayaa ugu baaqay dhammaan dhinacyada ay arrintu khusayso inay muujiyaan is-xakameyn si looga hortago xiisado hor leh oo ka dhasha gobolka.
Wasaaradda Arrimaha Dibadda ayaa sheegtay in Soomaaliya ay garab taagan tahay dowladda iyo shacabka Kuwait xilligan adag, iyadoo xustay in khilaafaadka lagu xalliyo wada-hadal iyo waddooyin diblomaasiyadeed oo nabadeed.
Bayaankan ayaa kusoo aadaya xilli ay sii kordhayaan walaacyada la xiriira amniga gobolka Khaliijka, halkaas oo ay socdaan dadaallo diblomaasiyadeed oo lagu xoojinayo xasilloonida iyo yareynta xiisadaha.
Ilaa hadda lama shaacin faahfaahin rasmi ah oo dheeraad ah oo ku saabsan khasaaraha ama saameynta ka dhalatay weerarrada lagu sheegay bayaanka dowladda Soomaaliya.
