Wararka24: Madaxweynaha Eritrea Isaias Afwerki ayaa si adag u dhaliilay siyaasadda caalamiga ah ee Madaxweynaha Mareykanka Donald Trump, isaga oo sheegay in jihada ay qaadanayso siyaasadda Washington ay u baahan tahay qiimeyn iyo taxaddar dheeraad ah.
Khudbad uu ka jeediyay magaalada Asmara munaasabadda sannad-guurada xorriyadda Eritrea, ayuu Afwerki ku sheegay in hal-ku-dhegga Trump ee “Make America Great Again” uu weli yahay arrin muran badan dhalin karta, isla markaana aan si fudud loo saadaalin karin saameynta uu ku yeelan doono dunida.
Afwerki ayaa ku eedeeyay maamulladii kala dambeeyay ee Mareykanka inay qeyb ka ahaayeen xasillooni-darrooyin caalami ah, faragelinno militari iyo kororka deynta dalkaasi. Wuxuu sidoo kale su’aal geliyay waxtarka siyaasadaha dhaqaale iyo canshuuraha ee maamulka Trump.
Madaxweynaha Eritrea ayaa sheegay in awoodda dal aan lagu cabbiri karin oo keliya awood ciidan, hub casri ah ama teknoolojiyad, balse loo baahan yahay nidaam caalami ah oo ku dhisan caddaalad iyo iskaashi.
Danka kale khudbaddiisa ayuu kaga hadlay xiisadaha la xiriira Iran iyo marin-biyoodka Hormuz, isaga oo ka digay tallaabooyin horseedi kara qalalaase hor leh. Wuxuu ku baaqay in khilaafaadka lagu xalliyo wada-hadal iyo habab diblomaasiyadeed.
Hadalka Afwerki ayaa kusoo aadaya xilli ay soo baxayaan warar sheegaya in Washington ay ka fiirsanayso hagaajinta xiriirka ay la leedahay Eritrea, kadib sannado ay jireen cunaqabateyn iyo khilaaf siyaasadeed oo u dhexeeyay labada dhinac.
Afwerki ayaa si kooban uga hadlay xaaladda Geeska Afrika, isagoo sheegay in dalalka Soomaaliya, Itoobiya, Sudan iyo South Sudan ay wajahayaan caqabado amni iyo siyaasadeed oo u baahan xalal waara iyo iskaashi gobolka dhexdiisa ah.
Madaxweynaha Eritrea ayaa ugu dambeyn ku baaqay in la yareeyo faragelinta dibadda ee arrimaha gobolka, isaga oo sheegay in xasilloonida Geeska Afrika lagu gaari karo wada-shaqeyn iyo ixtiraam madax-bannaanida dalalka gobolka.
