Muqdisho – Wararka24: Maamulka Gobolka Banaadir ayaa si rasmi ah u beeniyay warar sheegayay in shaqaalaha maamulka lagu qasbay inay iska diiwaangeliyaan ururro siyaasadeed, isagoo caddeeyay in eedeymahaasi aanay wax sal iyo raad ah lahayn.
War-saxaafadeed kasoo baxay xafiiska maamulka gobolka ayaa lagu sheegay in maamulka uu si buuxda u ixtiraamayo xorriyadda muwaadiniinta Soomaaliyeed iyo doorashada madax-bannaan ee qof kasta uu u leeyahay inuu ku biiro ama ka madax-bannaanaado urur siyaasadeed.
“Maamulka Gobolka Banaadir waxa uu shacabka Soomaaliyeed iyo Guddiga Madaxa-bannaan ee Doorashooyinka Qaranka u caddeynayaa in uusan wax lug ah ku lahayn eedeymaha ku saabsan in shaqaalaha Gobolka Banaadir lagu qasbayo inay iska diiwaangeliyaan ururro siyaasadeed,” ayaa lagu yiri qoraalka rasmiga ah ee maamulka.
Maamulka ayaa intaa ku daray in doorkiisa uu ku koobanyahay dhiirrigelinta iyo wacyigelinta dadweynaha ee ku aaddan isdiiwaangelinta codbixiyayaasha, taas oo uu ku tilmaamay waajib qaran oo lagu garab taagan yahay Guddiga Doorashooyinka Qaranka.
Sidoo kale, maamulka ayaa ugu baaqay cid kasta oo dareensan in magaceeda la isticmaalay ama eedeymo ka keentay arrintan in ay adeegsato hannaan sharci ah, halkii ay bulshada ugu faafin lahayd warar aan la hubin.
Ugu dambayn, Maamulka Gobolka Banaadir ayaa bogaadiyay wadashaqeynta ka dhaxaysa Guddiga Doorashooyinka Qaranka, isagoo ballanqaaday inuu sii wadi doono iskaashiga iyo taageerada ku aaddan hirgelinta doorashooyin xor ah, hufan oo daahfuran.
