Wararka24: 12-02-2026 Ra’iisul Wasaarihii hore ee Soomaaliya, Xasan Cali Kheyre, ayaa si adag u dhaliilay hannaanka ay Xukuumadda Federaalka ku wado arrimaha dastuurka iyo jihada siyaasadeed ee dalka, isagoo sheegay in muddada kooban ee ka harsan muddo-xileedka dowladda aan lagu xallin karin arrimaha masiiriga ah ee dalka.
Kheyre ayaa sheegay in saddexda bilood iyo dhowrka maalmood ee ka haray xil-heynta xukuumadda aan lagu dhisi karin Dastuur dhammeystiran, aan lagu mideyn karin ummad kala aragti duwan, isla markaana aan gargaar waara lagu gaarsiin karin malaayiinta ay abaaruhu saameeyeen.
Wuxuu ku adkeeyay in waqtigan kooban lagu gaari karo oo keliya is-afgarad ku saabsan hannaanka doorasho ee dalka, si looga fogaado qalalaase siyaasadeed iyo hubanti la’aan hor leh.
Dhankiisa, Ra’iisul Wasaarihii hore Maxamed Xuseen Rooble ayaa isna muujiyay walaac la xiriira xiisadda siyaasadeed ee dalka, isagoo Madaxweynaha ugu baaqay inuu xaaladda dejiyo, dhexda soo dhigo, kana shaqeeyo isu-soo-dhowaansho ku dhisan walaaltinimo iyo ehelnimo Soomaaliyeed.
Rooble ayaa ku taliyay in si degdeg ah loo joojiyo wax-ka-beddelka dastuurka ee aan lagu heshiin, si looga hortago sii hurinta khilaafaadka jira.
Hadallada labada Ra’iisul Wasaare hore ayaa imanaya xilli dalka uu wajahayo muran siyaasadeed oo xooggan oo la xiriira dastuurka, doorashooyinka iyo jihada hoggaanka, taas oo abuurtay walaac ballaaran oo ka dhex jira siyaasiyiinta iyo bulshada Soomaaliyeed.
