Wararka24: Guddiga Madaxa-bannaan ee Doorashooyinka Qaranka ayaa soo saaray jadwalka rasmiga ah ee doorashada guddoonka Golaha Wakiillada iyo hoggaamiyaha Dowlad-goboleedka Koonfur Galbeed.
Sida jadwalku muujinayo, 2-da iyo 3-da Juun waxaa la qabanayaa araajida musharaxiinta u tartamaya xilalka guddoomiyaha iyo guddoomiye ku xigeennada Golaha Wakiillada. Muddadaas ayaa sidoo kale la shaacin doonaa liiska rasmiga ah ee musharaxiinta u taagan hoggaanka baarlamaanka.
4-ta Juun ayaa musharaxiinta guddoonka Golaha Wakiillada jeedin doonaan khudbadahooda ololaha, iyadoo isla maalintaas la qaban doono doorashada guddoonka cusub ee golaha.
Dhanka kale, 5-ta iyo 6-da Juun ayaa loo qorsheeyay diiwaangelinta musharaxiinta u tartamaya xilka hoggaamiyaha Dowlad-goboleedka Koonfur Galbeed. Kadibna 7-da Juun ayaa la shaacin doonaa liiska kama dambaysta ah ee musharaxiinta.
Musharaxiinta u tartamaya hoggaanka maamulka ayaa 8-da Juun soo bandhigi doona barnaamijyadooda siyaasadeed iyo qorshayaashooda hoggaamineed, iyagoo khudbado ka hor jeedin doona xubnaha Golaha Wakiillada.
Guddiga Doorashooyinka ayaa sidoo kale shaaciyay in 10-ka Juun loo asteeyay maalinta la qabanayo doorashada hoggaamiyaha cusub ee Koonfur Galbeed, taas oo lagu soo dooran doono maamulka hoggaamin doona dowlad-goboleedka sannadaha soo socda.
Doorashooyinkan ayaa kusoo aadaya xilli ay ka jirto xiisad siyaasadeed iyo mid amni oo ka taagan deegaannada Koonfur Galbeed, kadib iska horimaadyo dhawaan ka dhacay magaalada Baydhabo.
Madaxweynihii hore ee Koonfur Galbeed, Cabdicasiis Xasan Maxamed (Lafta-gareen), ayaa weli ku adkeysanaya mowqifkiisa siyaasadeed, iyadoo arrintaasi ay sii xoojisay muranka ku saabsan hoggaanka maamulka.
