Wararka24: Xisbiga Himilo Qaran ee uu hoggaamiyo Sheekh Shariif Sheekh Axmed ayaa war-saxaafadeed uu soo saaray ku faahfaahiyay dhacdooyinkii la xiriiray dagaalkii ka dhacay xaruntiisa degmada Cabdicasiis iyo qodobada lagu heshiiyay si loo dejiyo xiisadda.
Xisbiga ayaa sheegay in weerarka lagu qaaday xaruntiisa uu dhacay 3-dii Juun 2026, xilli ay madaxda iyo howl-wadeennadu ku jireen diyaarinta bannaanbax nabadeed oo la qorsheeyay inuu ka dhaco Muqdisho. Sida uu xisbigu sheegay, bannaanbaxaasi wuxuu ahaa mid lagu muujinayay aragtiyo ku saabsan xaaladda siyaasadeed ee dalka.
Himilo Qaran ayaa ku eedeysay ciidamada dowladda inay adeegsadeen hub culus, madaafiic iyo daroonno, iyadoo sheegtay in qalabkaasi markii hore loogu talagalay la dagaallanka kooxaha argagixisada. Xisbigu wuxuu sheegay in ilaaladiisu ay iska caabiyeen weerarka isla markaana ay muujiyeen dulqaad iyo masuuliyad.
War-saxaafadeedka ayaa sidoo kale lagu sheegay in kadib dagaalka ay billowdeen dadaallo dhexdhexaadin ah oo ay hormuud ka ahaayeen wakiillo ka socda beesha caalamka iyo odayaal dhaqameed, kuwaas oo lagu doonayay in lagu joojiyo colaadda.
Sida uu xisbigu sheegay, 4-tii Juun waxaa lagu heshiiyay qodobo ay ka mid yihiin xabbad-joojin degdeg ah, kala qaadista ciidamada is-horfadhiyay iyo in la bilaabo wada-hadallo siyaasadeed oo looga hadlayo arrimaha doorashooyinka iyo mustaqbalka siyaasadeed ee dalka.
Qodobada kale ee uu xisbigu sheegay in lagu heshiiyay waxaa ka mid ahaa in ciidamada goobta joogay loo oggolaado inay qaataan gaadiid iyo agab waxyeello soo gaartay, iyo in aan ciidamo cusub la geeyn xarunta cusub ee Himilo Qaran ee xeebta Liido.
Himilo Qaran ayaa sidoo kale ku eedeysay Madaxweyne Xasan Sheekh Maxamuud inuu jebiyay heshiiska xabbad-joojinta, iyadoo sheegtay in ciidamo ka tirsan NISA ay jid-gooyo u dhigeen kolonyo ay la socdeen wakiillo caalami ah oo ku sii jeeday xarunta xisbiga.
Xisbiga ayaa xusay in Sheekh Shariif Sheekh Axmed uu door weyn ka qaatay dejinta xaaladda iyo ka hortagga isku dhac hor leh intii ay socdeen dadaallada lagu xallinayay xiisadda.
Dhanka kale, Dowladda Federaalka Soomaaliya ayaa hore u sheegtay in ciidamada ammaanku ay soo gabagabeeyeen howlgal amni oo lagu wajahayo kooxo hubeysan oo ay ku eedeysay inay amni-darro ka abuureen Muqdisho. Dowladda waxay sidoo kale ku eedeysay siyaasiyiin mucaarad ah inay abaabuleen maleeshiyaad hubeysan, halka mucaaradkuna ay dowladda ku eedeeyeen adeegsiga awood ciidan oo ka dhan ah khilaaf siyaasadeed.
Xiisadda ka dhalatay dhacdooyinkan ayaa weli ah mid si weyn looga hadal hayo gudaha dalka, iyadoo dadaallada wada-hadalka iyo dhexdhexaadinta ay sii socdaan.
