Wararka24: Madaxweynihii hore ee Soomaaliya, Sheekh Shariif Sheekh Axmed, ayaa hada ka guuray aagga Mirinaayo ee degmada Cabdicasiis, halkaas oo uu ku sugnaa maalmihii lasoo dhaafay xilli ay taagneyd xiisad siyaasadeed iyo mid amni.
Wararka ayaa tilmaamaya in Sheekh Shariif uu dib ugu laabanayo gurigiisa ku yaalla agagaarka Aden Adde International Airport, kadib wada-hadallo iyo dadaallo dhex-dhexaadin ah oo socday sacadihii lasodafay, Kadib kulan daxmaray Taliye Shuute, Taliyaha Ciidanka Xooga dalka Ibraahim iyo Madaxweynihi hore Sheek Shariif.
Ilo xog ogaal ah ayaa sheegaya in madaxweynihii hore uu weli ku adkeysanayo in aan laga qaadin ilaaladiisa gaarka ah, isaga oo doonaya in la xaqiijiyo amnigiisa inta lagu guda jiro xalinta khilaafka taagan.
Go’aankan ayaa kusoo aadaya xilli xaaladda guud ee Muqdisho ay maanta u muuqato mid ka deggan sidii ay ahayd maalmihii lasoo dhaafay, kuwaas oo lagu arkay dhaq-dhaqaaqyo ciidan iyo iska-horimaadyo sababay walaac amni.
Wararka ayaa sidoo kale sheegaya in dadaallada ay wadeen odayaal dhaqameed, siyaasiyiin iyo dhinacyo kale oo dhexdhexaadin ah ay qayb ka qaateen in la gaaro is-afgarad hordhac ah oo yareya xiisadda.
Sidoo kale, waxaa la filayaa in magaalada Muqdisho ay ka billowdaan kulamo siyaasadeed oo looga hadlayo arrimaha doorashooyinka, dastuurka iyo khilaafaadka jira, iyadoo Turkiga lagu soo warramayo inay taageero ka geysaneyso dadaallada wada-hadalka.
Inkasta oo xaaladdu hadda u muuqato mid deggan, haddana dhinacyada siyaasadda Soomaaliya ayaa weli wajahaya caqabado la xiriira sidii loo gaari lahaa heshiis siyaasadeed oo waara oo lagu xalliyo murannada taagan.
