Wararka24: Guddoomiyaha Hay’adda Maareynta Musiibooyinka Qaranka SoDMA, Maxamuud Macalin Cabdulle ayaa maanta xarunta hay’adda ku qaabilay Tom Fletcher, oo ah Ku-xigeenka Xoghayaha Guud ee Qaramada Midoobay u qaabilsan Arrimaha Bani’aadannimada iyo Isku-duwaha Gargaarka Degdegga ah.
Kulanka ayaa diiradda lagu saaray xaaladaha bani’aadannimo ee ka jira Soomaaliya iyo sidii loo xoojin lahaa iskaashiga u dhexeeya dowladda iyo hay’adaha caalamiga ah si wax looga qabto dhibaatooyinka sii kordhaya.
Guddoomiyaha SoDMA ayaa kulanka ku soo bandhigay xaaladaha adag ee dalka ka jira, gaar ahaan saameynta ay abaaruhu, barakaca iyo isbeddelka cimiladu ku yeesheen bulshada Soomaaliyeed, isagoo xusay muhiimadda ay leedahay in la dardargeliyo gurmadka iyo taageerada dadka nugul.
Tom Fletcher ayaa sheegay in booqashadiisa Soomaaliya ay la xiriirto qiimeynta xaaladaha bani’aadannimo iyo saameynta musiibooyinka dabiiciga ah, si loo xoojiyo taageerada caalamiga ah ee loo fidinayo shacabka Soomaaliyeed.
Kulanka waxaa sidoo kale ka qeyb galay madax ka socotay hay’adaha bani’aadannimada, kuwaas oo isla qaatay muhiimadda wada-shaqeyn dhow oo lagu xallinayo caqabadaha bani’aadannimo ee dalka ka jira.
Soomaaliya ayaa weli wajahaysa xaalado bani’aadannimo oo adag, iyadoo kumannaan qoys ay saameeyeen abaaraha, fatahaadaha iyo barakaca, taas oo sare u qaadaysa baahida loo qabo gurmad degdeg ah iyo qorsheyaal waara oo wax looga qabto dhibaatooyinkaasi.
