Wararka24: Ku dhowaad 62,000 oo qof ayaa ka barakacay abaaraha ka jira Soomaaliya tan iyo bilowgii sanadkan, sida ay sheegtay hay’adda Caalamiga ee socdaalka (IOM).
Hay’addu waxay tilmaamtay in abaartu ay sabab u tahay in ka badan saddex meelood laba meel barakacyada cusub, iyadoo la diiwaangeliyay koror gaaraya 22 boqolkiiba marka loo eego sanadkii hore. Tani waxay muujinaysaa saameynta sii kordheysa ee isbeddelka cimilada.
Sida ku cad xogta Displacement Tracking Matrix (DTM), waxaa la filayaa in ilaa 125,000 oo qof oo kale ay barakacaan rubuca labaad ee sanadkan, xitaa haddii roobabka xilliga Gu ay noqdaan kuwo caadi ah ama ka wanaagsan celceliska.
Madaxa IOM ee Soomaaliya, Manuel Pereira, ayaa sheegay in xaaladdu tahay mid sii xumaanaysa. Wuxuu xusay in yaraanta biyaha, qalaylka dalagyada iyo burburka nolol-maalmeedka ay dadka ku qasbayaan inay ka guuraan deegaanadooda.
Degmooyinka sida Baydhabo, Dayniile, Kahda, Diinsoor iyo Doolow ayaa ka mid ah meelaha ugu daran ee ay abaartu saameysay, halkaas oo ay ka jiraan dalagyo baaba’ay iyo ilaha dhaqaale oo burburay. Arrintan ayaa sii kordhisay gaajada iyo culayska ku yimid adeegyada aasaasiga ah.
Hay’adaha gargaarka ayaa ka digaya in haddii aan si degdeg ah loo qaadin tallaabooyin wax ku ool ah, abaartu ay sii wadi doonto inay kala daadiso bulshooyinka, isla markaana ay kordhiso nuglaanta dadka ku nool meelaha ay dhibaatadu saameysay.
Xaaladdan ayaa kusoo beegmeysa xilli Soomaaliya ay weli la tacaaleyso saameynta abaaro soo noqnoqday, kuwaas oo si weyn u saameeyay nolosha malaayiin qof oo ku tiirsan beeraha iyo xoolaha
