Wararka24: Booliska Dowladda Federaalka ayaa saakay xoog ku soo galay Guriga Hooyooyinka ee Magaalada Muqdisho, gaar ahaan degmada Xamar Weyne, ka dib markii muran dheer ka taagnaa cidda maamusha dhismaha.
Dhismahan, oo sanadahanba uu maamulayay Ururka Haweenka Qaranka, ayaa noqday meel muran wayn ka dib markii Dowladda Federaalka ay codsatay in lagu wareejiyo Wasaaradda Qoyska & Xaquuqul Insaanka. Haweenka oo dhismahaasi ku leh xafiisyo ay ka shaqeeyaan ayaa si weyn uga horyimaaday wareejinta.
Ciidanka Booliska ayaa gurigaasi ku qabqabtay qaar ka mid ah haweenkii ka hawlgalayay. Wararka ayaa sheegaya in ciidamadu ay xireen haweenka, kuwaas oo ay ku jirtay Gudoomiye Ku-xigeenka Ururka Haweenka Qaranka, iyaga oo loo tuuray Saldhigga Afar Irdood ee Degmada Xamar Weyne.
Gudoomiyaha Ururka Haweenka Qaranka, Batuulo Sheekh Axmed Gabale, ayaa si adag uga hadashay falkaan, isaga oo sheegay in ciidamo uu soo diray Raysal Wasaaraha Xukuumadda, Xamse Cabdi Barre, ay xoog kula wareegeen xaruntii ay ku shaqeynayeen.
Waxaa xarunteenna soo weeraray ciidamo uu soo diray Raysal Wasaaraha oo boolis ah, iyagoo la wareegay xaruntii,” ayay tiri Batuulo.
Iyadoo sii hadlaysay, ayay tiri: “Guriga Hooyooyinka ee Magaalada Muqdisho waa dhismo taariikhi ah oo haweenka Soomaaliyeed gacmahooda iyo dhaqaalahooda ku dhisteen.
Dowladda ma aha mid ay hantideedu tahay. Waxay noqon doontaa caddaalad Ilaahay oo kaliya.”
Batuulo waxay sii xoojisay hadalkeeda: “Dowladda waxaa laga sugayay inay difaacdo dalka, laakiin maanta waxay noo soo weerartay Guriga Hooyooyinka ee Magaalada Muqdisho, oo ah meel haweenka Soomaaliyeed ugu halgamay dalkooda. Tani waa taariikh madow oo ku dhacday gabdhaha Soomaaliyeed.”
Raysal Wasaaraha, Xamse Cabdi Barre, oo dhawaan ka hadlay muranka, ayaa haweenka ugu baaqay inay dhismahaasi ku wareejiyaan Wasaaradda Qoyska & Xaquuqul Insaanka.
Waxaan rajeynayaa in haweenka ay u ixtiraamaan qarankooda oo ay u banneeyaan wasaaradda,” ayuu yiri Raysal Wasaaruhu.
Murankan oo ka dhashay gacan ku haynta Guriga Hooyooyinka ee Magaalada Muqdisho ayaa ku soo dhammaaday natiijo aan wanaagsaneyn, iyadoo haweenka Soomaaliyeed ay ka murugoodaan sida loo xukuntay hantidooda iyo halgankoodii taariikhi ah.
