Wararka24: Warar isa soo taraya ayaa sheegaya in qaar kamid ah warbaahinta madaxa-bannaan ee Soomaaliya ay cabashooyin u gudbiyeen safaaradaha reer Galbeedka ee Muqdisho, kadib markii ay sheegeen inay la kulmeen weerarro online ah oo lagu bartilmaameedsanayo wararkooda iyo akoonnadooda baraha bulshada.
Wararka ayaa tilmaamaya in shirkad lagu magacaabo CONVEY LLC, oo la sheegay inay ka shaqeyso arrimaha suuq-geynta islamarkaana xarun ku leedahay dalka Talyaaniga, ay sheegatay xuquuqda muuqaalada iyo wararka ay baahiyaan qaar kamid ah telefishinnada iyo idaacadaha madaxa-bannaan ee ka howlgala Soomaaliya.
Sida lagu sheegay eedeymaha la gudbiyay, tallaabooyinkan ayaa la rumeysan yahay in looga gol leeyahay in lagu yareeyo ama lagu xaddido wararka la xiriira mucaaradka iyo arrimaha siyaasadda ee dowladda Federaalka Soomaaliya lagu dhaliilo.
Ururka haweenka warbaahinta Soomaaliya ee SOMWA ayaa isna qoraal uu soo saaray ku sheegay inuu walaac xooggan ka qabo weerarro online ah oo sii kordhaya, kuwaas oo lagu beegsanayo suxufiyiinta Soomaaliyeed, xarumaha warbaahinta madaxa-bannaan iyo dadka caanka ku ah baraha bulshada.
SOMWA ayaa sheegtay in weerarradan ay kusoo aadayaan xilli warbaahinta madaxa bannaan ay horey ula kulmeysay cadaadisyo kala duwan oo ay kamid yihiin xarig, cabsi gelin iyo dhibaateyn joogto ah oo ka dhan ah xorriyadda saxaafadda.
Wararka ayaa sidoo kale sheegaya in dacwooyin loo gudbiyay shirkadda Meta ay hoos u dhigeen saameynta shirkadda CONVEY LLC, kadib markii la isku dayay in xuquuq been abuur ah lagu sheegto muuqaallada iyo wararka lagu daabaco bogagga Facebook ee warbaahinta Soomaaliyeed.
Xarumaha warbaahineed ee la sheegay inay saameeyeen weerarradan online-ka ah waxaa kamid ah Universal TV, Shabelle TV iyo Dalsan TV, kuwaas oo la sheegay in qaar kamid ah waxyaabihii ay baahin jireen laga saaray ama la xaddiday.
Ilaa hadda dowladda Federaalka Soomaaliya si rasmi ah ugama aysan hadlin eedeymahan la xiriira weerarrada online-ka ah iyo sheegashada loo jeediyay shirkadda la magacaabay.
