Wararka24: Wasiirka Arrimaha Gudaha ee Dowladda Federaalka Soomaaliya Cali Yuusuf Cali (Xoosh) ayaa si dadban u weeraray Madaxweynaha Puntland Saciid Cabdullaahi Deni kadib markii wafdi ka socday Puntland ay ka qayb-galeen munaasabaddii 18-ka May ee lagu qabtay magaalada Hargeysa.
Wasiirka ayaa sheegay in aan taageerada qadiyadda Somaliland lagu heli karin faa’iido siyaasadeed ama cod doorasho, isaga oo carrabka ku adkeeyay in midnimada Soomaaliya ay tahay arrin qaran oo aan loo adeegsan karin dano siyaasadeed.
Cali Xoosh ayaa sidoo kale sheegay in siyaasiyiinta isku dayaya inay ka faa’iideystaan kala qeybsanaanta Soomaaliya aysan ku guuleysan doonin himilooyinkooda siyaasadeed. Wuxuu tilmaamay in shacabka ku nool deegaannada Waqooyi Bari aysan aqbali doonin in rabitaankooda siyaasadeed la hoos geeyo dano kale.
“Qofna guul siyaasadeed kuma gaarayo, Soomaalina cod siyaasadeed kagama kasban karo qof buun-buuninaya kala goynta Soomaaliya,” ayuu yiri wasiirka oo hadal culus jeediyay.
Hadalkan ayaa yimid kadib markii wafdi dhaqameed uu hoggaaminayay Yaasiin Muuse Boqor ay ka qayb-galeen dabaal deggii 18-ka May ee Somaliland. Wafdigaasi ayaa sheegay inay ixtiraam u hayaan jiritaanka Somaliland, ayna Puntland taageersan tahay qadiyadda maamulkaasi, arrintaas oo dhalisay falcelin xooggan.
Baraha bulshada ayaa si weyn looga hadlay hadalka wafdigaasi, iyadoo qaar kamid ah siyaasiyiinta iyo shacabka ay u arkeen mid sii hurin karta khilaafka siyaasadeed ee u dhexeeya Dowladda Federaalka iyo Puntland.
Khilaafka u dhexeeya Muqdisho iyo Puntland ayaa sii xoogeysanayay bilihii lasoo dhaafay, iyadoo labada dhinac ay isku hayaan arrimo ay kamid yihiin doorashooyinka dalka, wax ka beddelka dastuurka iyo awood qaybsiga siyaasadeed.
