Wararka24: Hay’adda Nabad sugidda ayaa faah-faahin ka bixisay howlgal qorsheysan oo maanta ay si wadajir ah ula fuliyeen saaxiibada caalamiga ah qaybo kamid ah gobolka Hiiraan, kaas oo lagu beegsaday xubno iyo horjoogayaal ka tirsan Al-Shabaab.
Howlgalka ayaa ka dhacay deegaanka Buq-aqable, halkaas oo lagu bartilmaameedsaday goob ay ku sugnaayeen maleeshiyaad iyo horjoogayaal sare oo kooxda ka tirsan. Warsaxaafadeed kasoo baxay NISA ayaa lagu sheegay in howlgalka lagu gaarsiiyay dhaawacyo culus xubno muhiim ah oo kooxda ka howlgalayay gobollada dhexe.
NISA ayaa sheegtay in dadka dhaawacyada halista ah lagu gaarsiiyay ay kamid yihiin Cali Xuseen oo lagu sheegay horjoogaha maleeshiyaadka fulin jiray weerarrada gobollada dhexe, Mowliid Jiis oo lagu tilmaamay wakiilka kooxda ee degmada Buulo-burde, iyo Maxamed Hiiraan oo isna lagu sheegay wakiilka kooxda ee degmada Jalalaqsi.
Sidoo kale, hay’addu waxay sheegtay in howlgallo kale oo xigay lagu burburiyay goobo ay kooxda ku abaabuleysay maleeshiyaad cusub. Qoraalka NISA ayaa lagu sheegay in ilaa shan gaari lagu gubay howlgalkaasi, kuwaas oo saddex kamid ah ay ahaayeen gaadiidka dagaalka ee nooca BG loo yaqaano.
Mid kamid ah gaadiidka la burburiyay ayaa la sheegay inuu ku xirnaa qoriga lidka diyaaradaha. NISA ayaa xustay in howlgaladan ay qeyb ka yihiin dadaallada lagu wiiqayo awoodda kooxda Al-Shabaab iyo ka hortagga weerarro ay qorsheynayeen.
Hay’adda Nabad-sugidda ayaa sidoo kale sheegtay inay sii wadi doonto howlgalada ka dhanka ah Al-Shabaab iyo Daacish, si loo xoojiyo amniga iyo xasiloonida dalka, gaar ahaan deegaannada ay kooxahaasi weli dhaq-dhaqaaqa ku leeyihiin.
Howlgalkan ayaa kusoo aadaya xilli ciidamada dowladda iyo saaxiibada caalamiga ah ay sare u qaadeen weerarrada iyo duqeymaha ka dhanka ah Al-Shabaab ee ka socda gobollada dalka qaarkood.
