Wararka24: Duqeymo diyaaradeed oo saacadihii la soo dhaafay ka dhacay gobollada Jubbada Dhexe iyo Shabeellaha Hoose ayaa lagu beegsaday dagaalyahanno ka tirsan ururka Al-Shabaab, kuwaas oo la sheegay in lagu diyaarinayay qorshayaal weerarro ah.
Wararka hordhaca ah ayaa sheegaya in duqeymaha ay ka kala dhaceen degmooyinka Sablaale, Kunyobarrow iyo deegaanka Yaaqbariweyne, halkaas oo lagu dilay ugu yaraan 30 xubnood oo ka tirsanaa kooxda. Ilo amni ayaa sheegay in xubnahaasi lagu tuhunsanaa inay diyaarinayeen weerarro ka dhan ah gudaha Ethiopia.
Sida ay sheegeen ilo wareedyo amni, goobaha la duqeeyay waxaa sidoo kale ku yaallay xarumo iyo kayd hub oo ay kooxdaasi isticmaali jirtay, kuwaas oo la burburiyay intii uu socday howlgalka.
Dhanka kale, duqeyn kale oo ka dhacday degmada Jilib ayaa lala beegsaday gaari ay la socdeen hoggaamiyeyaal sare oo ka tirsan Al-Shabaab. Wararka ayaa sheegaya in gaadhigaasi la burburiyay, isla markaana ay dhimasho iyo dhaawac ka dhasheen weerarka.
Mas’uuliyiinta dowladda Soomaaliya weli kama aysan soo saarin war rasmi ah oo ku saabsan khasaaraha guud, balse waxaa la filayaa in faah-faahin dheeraad ah la shaaciyo saacadaha soo socda.
Howlgallada ka dhanka ah Al-Shabaab ayaa toddobaadyadii dambe sii xoogeysanayay, iyadoo ciidamada dowladda iyo saaxiibada caalamiga ah ay kordhiyeen duqeymaha iyo howlgallada dhulka si loo wiiqo awoodda Al-Shabaab
