Wararka24: Taliyihii hore ee Hay’adda Nabad-sugidda iyo Sirdoonka Qaranka (NISA), Abdullahi Mohamed Ali Sanbaloolshe ayaa shaaca ka qaaday in Dowladda Federaalka Soomaaliya aysan weli gaarin heer ay si buuxda ugu madax-bannaan tahay dagaalka ka dhanka ah kooxda Al-Shabaab.
Sanbaloolshe oo wareysi bixiyay ayaa sheegay in inkastoo Soomaaliya ay hesho taageero caalami ah, gaar ahaan tan Mareykanka, haddana ay jiraan xaddidaadyo ku saabsan sida xogaha sirdoonka loo wadaago. Wuxuu tilmaamay in wada-shaqeynta sirdoon ay jirto, balse aysan ahayn mid dhammeystiran.
“Macluumaad waa la wadaagaa ilaa xad, laakiin boqolkiiba boqol wada-shaqeyn ma jirto,” ayuu yiri, isaga oo muujiyay in arrintan ay ka mid tahay caqabadaha ugu waaweyn ee hortaagan horumarka amniga.
Sidoo kale, wuxuu xusay in kalsooni la’aanta iyo cabsi laga qabo is-dhexgalka xogaha ay xaddidayaan iskaashiga buuxa ee dhinacyada amniga, taas oo saameyn ku leh awoodda Soomaaliya ay ugu dhaqaaqi karto si madax-bannaan.
Sanbaloolshe ayaa intaas ku daray in inkastoo ay jiraan dhinacyo iskaashi oo muuqda, sida hawlgallada militari iyo digniinaha amni, haddana Soomaaliya ay weli ku jirto marxalad dhisme oo u baahan maalgelin iyo horumarin dheeraad ah.
Wuxuu carrabka ku adkeeyay in loo baahan yahay in la xoojiyo awoodaha gudaha, gaar ahaan tiknoolajiyadda sirdoonka iyo tababarka shaqaalaha, si dalka uu u gaaro isku filnaansho dhinaca amniga ah.
Hadalka Sanbaloolshe ayaa kusoo aadaya xilli ay weli socdaan howlgallo militari oo ka dhan ah Al-Shabaab, iyadoo dowladda Soomaaliya ay dadaal ugu jirto inay si buuxda ula wareegto amniga dalka.
