Wararka24: Hay’adda NISA ayaa sheegtay in howlgal qorsheysan oo ka dhacay gobolka Shabeellaha Dhexe lagu dilay tiro badan oo ka tirsan Al-Shabaab, kadib iskaashi ay sameeyeen ciidamada dowladda iyo saaxiibo caalami ah.
Warsaxaafadeedka NISA(hoos ka akhriso warsaxaafadeedka oo dhammaystiran)ayaa lagu sheegay in howlgalka koowaad lagu bartilmaameedsaday guri ay ku sugnaayeen horjoogayaal iyo maleeshiyaad, halkaas oo lagu dilay ugu yaraan 15 xubnood. Goobtaas ayaa la sheegay in loo adeegsanayay abaabulka weerarro amni darro.
Sidoo kale, howlgal labaad oo ka dhacay deegaanka Guulane ayaa lagu khaarijiyay in ka badan 18 xubnood oo kale. Ciidamada ayaa sheegay in bartilmaameedka uu ahaa koox la sheegay inay isku uruurinayeen halkaasi.
NISA waxay intaas ku dartay in howlgaladaasi lagu burburiyay xarumo ay gabaad ka dhiganayeen kooxda, isla markaana la gubay gaari nooca Cabdi-bile ah oo ay u adeegsanayeen dhaq-dhaqaaqyada.
Sida lagu sheegay bayaanka, sirdoonka ayaa hore u helay xog muujinaysa in ilaa 90 xubnood lagu uruuriyay deegaanka, kuwaas oo qorsheynayay falal amniga lid ku ah. Tallaabooyinka la qaaday ayaa lagu sheegay kuwo lagu wiiqay abaabulkaas.
Hay’addu waxay xustay in howlgaladan ay qeyb ka yihiin dadaallada lagu xoojinayo amniga iyo la dagaallanka kooxaha hubeysan ee weli ka howlgala dalka.
Ugu dambeyn, NISA ayaa shacabka ugu baaqday inay la shaqeeyaan hay’adaha amniga, isla markaana la wadaagaan wixii xog ah ee la xiriira dhaqdhaqaaqyada kooxaha hubeysan.
warsaxaafadeedka oo dhammaystiran
