Wararka24: Wasaaradda Arrimaha Dibadda ee Dowladda Federaalka Soomaaliya ayaa si rasmi ah u beenisay wararka sheegaya in dowladda ay qorsheyneyso inay dalka ka erido safiirka Imaaraadka Carabta ee ku sugan Muqdisho, iyadoo sheegtay in wararkaasi yihiin kuwo aan wax sal ah lahayn.
War-saxaafadeed kasoo baxay wasaaradda oo ku taariikheysan 5-da May 2026 ayaa lagu sheegay in xogaha lagu faafiyay warbaahinta iyo baraha bulshada ay yihiin kuwo khaldan, isla markaana wax u dhimi kara xiriirka diblomaasiyadeed ee u dhexeeya Soomaaliya iyo Imaaraadka Carabta.
Wasaaraddu waxay ugu baaqday warbaahinta iyo bulshada isticmaasha baraha bulshada inay muujiyaan mas’uuliyad dheeraad ah, hubiyaanna saxnaanta xogaha ay faafinayaan, si looga fogaado marin-habaabinta iyo dhaawaca sumcadda xiriirrada diblomaasiyadeed.
Qoraalka ayaa sidoo kale lagu xusay in faafinta wararka aan la xaqiijin ay keeni karto jahwareer siyaasadeed iyo saameyn aan loo baahnayn oo ku timaadda xiriirka Soomaaliya iyo dalalka Carabta, gaar ahaan Imaaraadka.
Dowladda Soomaaliya ayaa horay bishii Janaayo u joojisay heshiisyo dhowr ah oo ay la lahayd Imaaraadka, kuwaas oo quseeyay dekedaha, amniga iyo difaaca, kadib markii xukuumaddu sheegtay inay heshay xog la xiriirta falal wax u dhimaya madaxbannaanida dalka.
Si kastaba, dowladda ayaa markaas caddeysay in tallaabooyinkaasi aysan ka dhignayn goynta xiriirka diblomaasiyadeed, isla markaana labada dal ay sii wadi doonaan wada-shaqeynta iyo howlaha safaaradeed ee caadiga ah.
