Dhuusamareeb –Kadib dilkii argagaxa Ciidamada ammaanka ee dowlad-goboleedka Galmudug ayaa gacanta ku dhigay laba ka mid ah saddex eedeysane oo lagu tuhunsan yahay in deegaanka Qaayib ee gobolka Galgaduud ku dileen hooyo iyo saddex carruur ah oo ay dhashay.
Howlgalka oo socday ku dhowaad 24 saacadood ayaa la sheegay inuu si gaar ah loogu beegsaday rag looga shakisan yahay falkaasi argagaxa leh. Saraakiisha hoggaamineysa hawlgalkan ayaa sheegay in ciidamada ay heleen xog muhiim ah oo horseeday qabashada eedeysanayaasha, iyagoo sheegay in dad deegaanka ahi ay kaalin weyn ka qaateen soo gudbinta macluumaad sirdoon ah.
Wararka ayaa intaas ku daraya in ciidamada ay weli ku raad joogaan eedeysane saddexaad oo la rumeysan yahay inuu si toos ah uga qeyb qaatay dilka, waxaana la filayaa in saacadaha ama maalmaha soo socda gacanta lagu soo dhigo.
Dhacdadan naxdinta leh ayaa habeen hore ka dhacday qaybo ka mid ah gobolka Galgaduud, waxaana si arxan darro ah loo dilay hooyo Sahro Cartan Xirsi iyo saddex gabdhood oo ay dhashay, kuwaas oo kala ahaa Nuurto Axmed Maxamuud, Xaawo Axmed Maxamuud iyo Faa’iso Axmed Maxamuud. Qof kale oo qoyska la joogay ayaa dhaawac soo gaaray.
Goobjoogayaal ayaa sheegay in hooyada iyo carruurteeda ay hurdayeen xilligii ay weerarka ku dhaceen, waxaana maleeshiyaadka hubeysan ay rasaas kaga fureen gudaha guriga, iyagoo madaxa ka wada toogtay.
Warar horudhac ah ayaa tilmaamaya in falka uu salka ku hayo aano qabiil oo muddooyinkii dambe xiisad ka taagneyd deegaanno ka tirsan Galgaduud. Gobolka ayaa muddooyinkii dambe ku soo batay dilalka qorsheysan ee qabiilka la xiriira, kuwaas oo bulshada cabsi xooggan ku reebay.
Maalmo ka hor ayay ahayd markii deegaanka Raxan-reeble ee isla gobolkaasi lagu dilay nin shacab ah, halka dhawaan degmada Gaalkacyo loogu dilay Dr. Cumar Cabdi Daahir (Surweyn), oo ka mid ahaa dhaqaatiirta da’da yar. Waxa uu noqday dhakhtarkii labaad ee sanad gudihiis loogu dilo aano qabiil, kadib markii hore isla Gaalkacyo loogu dhex toogtay Dr. Sakariye Cabdi Jaamac xaruntiisa caafimaad.
Falalka noocan oo kale ah ayaa sii kordhaya gobollada dhexe, waxaana shacabka deegaanka ay ku tilmaameen khatar weyn oo caqabad ku noqotay nabadda iyo xasilloonida bulshada.
Lasoco wararki ugu danbeeyey si toos ah live somalia?
