Wararka24: 22-01-2026 Wararka laga helayo deegaanka Kudhaa ee gobolka Jubbada Hoose ayaa sheegaya in saakay markale uu ka qarxay gudaha magaaladaas dagaal culus oo u dhexeeya maleeshiyaadka Al-Shabaab iyo ciidamada Daraawiishta Jubbaland.
Dagaalka ayaa la soo warinayaa inuu yahay mid aad u xooggan, iyadoo labada dhinac ay isku adeegsanayaan hub kala duwan, waxaana dhawaqa hubka culus laga maqlayay deegaano ka fog magaalada Kudhaa, sida ay sheegeen dadka deegaanka.
Ilo ku sugan Kudhaa ayaa warbaahinta u xaqiijiyay in maleeshiyaadka Al-Shabaab ay xalay ku hoydeen gudaha magaalada, kadib markii shalay dagaal culus ay kula wareegeen gacan ku haynteeda.
Ciidamada Daraawiishta Jubbaland ayaa saakay qaaday weerar dhowr jiho ah oo ay dib ugu galeen magaalada, waxaana la soo warinayaa in dagaalka uu sababay khasaare kala duwan oo soo kala gaaray labada dhinac, inkastoo aan weli la helin tiro rasmi ah.
Illaa iyo hadda, wax war ah kama soo bixin maamulka Jubbaland oo ku saabsan dagaallada saacadahii la soo dhaafay ka dhacay Kudhaa, balse waxaa la filayaa in faahfaahin dheeraad ah ay ka bixiyaan saacadaha soo socda.
Lasoco WARARKA24 wixii kusoo kordha warkaan.
