Wararka24: 23-01-2026 Dowladda Ingiriiska ayaa soo dhoweysay gogosha wadatashi qaran ee uu fidiyay Madaxweynaha Soomaaliya, Xasan Sheekh Maxamuud, taas oo lagu doonayo in xal looga gaaro khilaafka siyaasadeed ee taagan, gaar ahaan arrimaha la xiriira doorashooyinka.
Bayaan kasoo baxay Safaaradda Boqortooyada Ingiriiska ee Soomaaliya ayaa lagu sheegay in Golaha Mustaqbalka Soomaaliyeed, oo ay ku mideysan yihiin hoggaamiyeyaasha Jubbaland, Puntland iyo siyaasiyiin mucaarad ah, lagu boorinayo inay ka qeybgalaan gogosha wadatashi ee ay fidisay Dowladda Federaalka Soomaaliya.
“Boqortooyada Ingiriiska waxay soo dhoweyneysaa ku dhawaaqista Dowladda Federaalka Soomaaliya ee ku saabsan qabsoomidda shir wadatashi qaran oo loo dhan yahay, kaas oo lagu qabanayo magaalada Muqdisho,” ayaa lagu yiri qoraalka ay safaaraddu ku baahisay barteeda X (ex-Twitter).
Bayaanka ayaa sidoo kale lagu adkeeyay muhiimadda ay leedahay in dhammaan dhinacyadu gaaraan is-afgarad ku saabsan hannaanka doorashooyinka, si loo xaqiijiyo xasilloonida siyaasadeed iyo horumarka waara ee Soomaaliya.
Madaxweynaha Soomaaliya ayaa Isniintii ku dhawaaqay gogol wadatashi qaran, isagoo casuumaad u diray madaxda iyo siyaasiyiinta ku bahoobay Golaha Mustaqbalka Soomaaliyeed. Xukuumadda uu hoggaamiyo Ra’iisul Wasaare Xamza Cabdi Barre ayaa sidoo kale diray casuumaado rasmi ah oo ku wajahan Madaxweynayaasha Jubbaland iyo Puntland, iyo hoggaamiyeyaasha mucaaradka.
Sida lagu sheegay xafiiska Ra’iisul Wasaaraha, shirweynaha wadatashiga qaran ayaa lagu wadaa inuu ka furmo magaalada Muqdisho 1-da bisha Febraayo 2026.
Si kastaba ha ahaatee, Golaha Mustaqbalka Soomaaliyeed ayaan weli si rasmi ah uga jawaabin casuumaadda dowladda, inkastoo goluhu horey u dalbaday in la qabto shir qaran oo looga arrinsanayo xaaladda guud ee dalka, oo ay ka mid yihiin doorashooyinka, wax-ka-beddelka dastuurka iyo arrimaha midnimada.
