Midowga Afrika iyo Midowga Yurub ayaa ka digay in yaraanta maalgelinta iyo caqabadaha howlgal ee ka jira howlgalka AUSSOM ay khatar gelin karaan guulihii laga gaaray dagaalka ka dhanka ah kooxda Al-Shabaab.
Digniintan ayaa ku jirtay war wadajir ah oo kasoo baxay kulanka 17-aad ee sannadlaha ah ee wadatashiga u dhexeeya Golaha Nabadda iyo Amniga ee Midowga Afrika iyo Guddiga Siyaasadda iyo Amniga ee Midowga Yurub.
Kulanka ayaa Jimcihii, 6-da Noofembar, lagu qabtay magaalada Addis Ababa ee dalka Itoobiya.
Labada hay’adood ayaa muujiyay walaac weyn oo ay ka qabaan yaraanta lacagta iyo caqabadaha howlgal ee soo socda, kuwaas oo ay sheegeen inay dib u celin karaan horumarkii dhowaan la gaaray.
Waxay sheegeen in xaaladdani ay hoos u dhigi karto dardarta dagaalka Al-Shabaab, isla markaana ay adkeyn karto qorshaha ah in Soomaaliya ay si buuxda ula wareegto mas’uuliyadda amnigeeda.
Sidoo kale waxay ku baaqeen in Soomaaliya ay hoggaamiso qiimeyn lagu sameynayo saameynta ka dhalan doonta dhimista la filayo ee xafiiska taageerada Qaramada Midoobay ee Soomaaliya (UNSOS).
Xafiiskaas ayaa bixiya taageerada saadka iyo adeegyada ciidamada howlgalka Midowga Afrika.
Labada dhinac ayaa ku nuuxnuuxsaday in howlgallada nabadda ee Afrika hoggaamiso ay u baahan yihiin lacag la saadaalin karo oo joogto ah.
Waxay soo jeediyeen in lacagtaas ay ka timaado Qaramada Midoobay iyadoo la raacayo go’aanka Golaha Ammaanka ee 2719, Sanduuqa Nabadda ee Midowga Afrika iyo taageerada saaxiibada caalamka.
Warka wadajirka ah ayaa ammaanay dowladda federaalka Soomaaliya, ciidamada AUSSOM iyo dalalka ciidamada ku leh howlgalka, horumarka ay ka sameeyeen la dagaallanka argagixisada.
Waxay sidoo kale xuseen dalalka ciidamo dheeraad ah u soo diray Soomaaliya iyagoo adeegsanaya heshiisyo laba geesood ah, waxayna u tacsiyeeyeen askartii ku dhimatay howlgalka.
Labada hay’adood ayaa mar kale xaqiijiyay taageeradooda madax bannaanida, wadajirka dhuleed iyo midnimada siyaasadeed ee Soomaaliya.
Digniintan ayaa timid xilli Uganda ay bilowday inay ciidamadeeda ka saarto Soomaaliya, taasoo kordhisay walaaca laga qabo mustaqbalka howlgalka.
Bishii Abriil ee sannadkan, Midowga Yurub iyo dalalka xubnaha ka ah ayaa ballanqaaday 75 milyan oo yuuro oo loogu talagalay AUSSOM.
Midowga Yurub ayaa labaatankii sano ee la soo dhaafay ku bixiyay ku dhowaad 2.8 bilyan oo yuuro howlgallada Midowga Afrika ee Soomaaliya.
