Madaxweynaha Jamhuuriyadda Federaalka Soomaaliya, Xasan Sheekh Maxamuud, ayaa maanta gaaray magaalada Jowhar, xarunta dowlad goboleedka Hirshabeelle.
Madaxweynaha waxaa soo dhaweeyay Madaxweynaha Hirshabeelle, Cali Cabdullaahi Xuseen (Guudlaawe), iyo boqolaal qof oo ka mid ah shacabka magaalada.
Isla markii uu gaaray, Xasan Sheekh wuxuu xarig ka jaray qeyb cusub oo laga dhisay garoonka diyaaradaha ee Maxamed Dheere, taasoo qeyb ka ah casriyeynta garoonka.
Kadib wuxuu ka qeyb galay xafladda caleemo saarka hoggaanka cusub ee Hirshabeelle, oo ay ku jiraan Madaxweyne Guudlaawe iyo ku xigeenkiisa Cabdifataax Xasan Afrax.
Xafladda waxaa sidoo kale ka qeyb galay Ra’iisul Wasaaraha Xukuumadda Federaalka, Guddoomiyaha Golaha Shacabka, Guddoomiyaha Gobolka Banaadir iyo madax ka socotay dowlad goboleedyada qaar.
Guudlaawe ayaa dib loogu doortay xilka 24-kii Oktoobar, kadib markii uu helay 81 cod oo ka mid ah 94 cod oo ansax ah oo ay bixiyeen xildhibaannada Golaha Wakiillada Hirshabeelle.
Isla maalintaas, Cabdifataax Xasan Afrax ayaa loo doortay madaxweyne ku xigeenka Hirshabeelle.
Kadib guushiisa, Guudlaawe wuxuu u mahadceliyay musharraxii la tartamay, isagoo sheegay in “dhammaanteen aan guuleysannay.”
Xafladda ka hor, amniga Jowhar ayaa la adkeeyay. Ciidamo dheeraad ah ayaa la dhigay wadooyinka iyo goobaha muhiimka ah, waxaana la baarayay gaadiidka magaalada dhex maraya.
Caleemo saarka ayaa imanaya xilli xiisad siyaasadeed ay ka taagan tahay Hirshabeelle.
Beelo ka mid ah bulshada gobolka Hiiraan ayaa si cad u diiday habka ay u dhacday doorashada maamulka, waxaana magaalada Beledweyne ka dhacay bannaanbaxyo la xiriira arrintaas.
