Muqdisho – Magaalada Muqdisho waxaa lagu soo bandhigay 1200 oo neef oo geel ah oo loo qorsheeyay in lagu qalo xuska mowlidka. Hilibkaas ayaa la sheegay in loo qeybin doono dadka danyarta ah iyo bulshooyinka kale ee magaalada, balse arrintan ayaa dhalisay dood ku saabsan halka ugu habboon ee sadaqada noocan oo kale ah loo diri karo.
Qaar ka mid ah dadka rayidka ah iyo falanqeeyayaasha ayaa isweydiinaya in mudnaanta ugu weyn uu leeyahay qofka ku sugan Muqdisho ee saddexdiisa waqti isku dulsaaran tahay iyo in loo gurmado carruurta Gaza oo laga yaabo inay maalmo badan wax cunto ah aanay cunin.
Dad badan ayaa ku doodaya in sadaqada la bixinayo ay ku habboon tahay in lagu taageero goobaha ugu daran ee dhibaatadu ka jirto, sida Gaza, oo xaalad bani’aadamnimo oo adag la soo dersay kadib dagaalka aan dhamaadka lahayn ee israaiil.
Aragtida kale ee doodda dhalisay ayaa ah in lacagta ku baxaysa qalka iyo qeybinta hilibkan loo isticmaali lahaa dhismaha adeegyada bulshada sida isbitaallo, iskuullo, ceelal iyo gargaarka dadka hoy la’aanta ah ee gudaha Soomaaliya. Sida ay qabaan dadkaasi, taasi waxay ahaan lahayd saameyn waarta oo ka weyn hilib la cunayo muddo labo maalmood ah.
Inkasta oon dadka deeqda bixiya aan la ogeyn, haddana codadka kasoo yeeraya bulshada qaar ayaa ku baaqaya in la qiimeeyo mudnaanta sadaqada, laguna saleeyo meelaha ay xaaladaha degdegga ahi ka jiraan.
Qodobkan ayaa si gaar ah culays ugu yeeshay waqtigan, maadaama Gaza lagu tilmaamayo meel aan hadda jirin cid ka mudan marka la eego baahida cunto, caafimaad iyo hoy. hoss ka daawo geela la diyaariyey in la qalo
