Wararka24: Ciidamada Mareykanka ee ka howlgala Geeska Afrika ayaa 18-kii Agoosto magaalada Kismaayo ku sameeyay tababar militari oo lagu tijaabiyay awoodda ciidamada ku sugan saldhigga ay isaga difaaci karaan weerar iyo sida gurmad degdeg ah loogu diri karo goob ay xaalad amni ka jirto.
Tababarka waxaa ka qeyb galay ciidamada loo yaqaan East African Response Force (EARF), kuwaas oo hoos taga taliska Combined Joint Task Force-Horn of Africa. Militariga Mareykanka ayaa sheegay in layliga lagu qabtay xarun amni oo ku taalla Kismaayo, iyadoo lagu tijaabiyay laba xaaladood oo kala ah difaaca saldhigga iyo keenista ciidamo gurmad ah.
Ujeeddada tababarka ayaa ahayd in la qiimeeyo sida ciidamada gurmadka iyo kuwa horay ugu sugnaa Kismaayo ay uga wada shaqeyn karaan xaalad degdeg ah. Waxaa sidoo kale lagu tijaabiyay isgaarsiinta, difaaca saldhigga, madaafiicda iyo gurmadka caafimaadka.
Sarkaal ka tirsan ciidamada Mareykanka, Austin Doughty, ayaa sheegay in ciidamada gurmadka markii ay Kismaayo yimaadeen si degdeg ah loogu daray nidaamka difaaca saldhigga. Wuxuu sheegay in la hubiyay ilaalada, diyaarinta madaafiicda, qorsheynta iyo kala wareejinta howlaha.
Doughty ayaa xusay in wada-xiriirka iyo isku-duwidda ciidamada ay ahaayeen qayb muhiim ah oo ka mid ah tababarka. Sida uu sheegay, layligu wuxuu fursad u noqday ciidamada inay tijaabiyaan habka ay uga wada shaqeyn lahaayeen xaalad dhab ah.
East African Response Force waxaa Mareykanku u diyaariyay inay si degdeg ah uga jawaabto xaaladaha degdegga ah ee ka dhaca Bariga Afrika, gaar ahaan meelaha ay ku sugan yihiin ciidamada ama danaha Mareykanka.
Lieutenant Ethan White, oo hoggaaminayay qeyb ka mid ah ciidamada tababarka, ayaa sheegay in layligu tijaabiyay awoodda ciidamada loogu gurman karo saldhig wajahaya weerar culus. Wuxuu sheegay in ciidamada gurmadka ay wateen khubaro hagta duqeymaha diyaaradaha, shaqaale caafimaad iyo ciidamo ku takhasusay madaafiicda.
White ayaa sheegay in ciidamada loo tababaray inay si degdeg ah ula qabsadaan saldhig aysan horey uga howlgeli jirin. Wuxuu xusay in aqoonsiga goobaha muhiimka ah, waddooyinka gudaha saldhigga iyo hab-raacyada ciidamada joogtada ahi ay muhiim u yihiin hawlgal kasta oo gurmad ah.
Tababarka waxaa sidoo kale qayb weyn ka ahaa gurmadka caafimaadka iyo sida loo maareyn karo xaalad ay ka dhashaan dhaawacyo badan. Sgt. Dana Raush oo ka tirsan EARF ayaa sheegtay in ciidamada caafimaadku ay marka ay goob cusub tagaan bartaan hab-raacyada caafimaad iyo kuwa amni ee ciidamada halkaas jooga.
Intii uu socday layliga, ciidamada gurmadka iyo kuwa Kismaayo ku sugnaa ayaa si wadajir ah uga jawaabay weerarro la jilay, iyadoo la tijaabiyay nidaamyada difaaca, isgaarsiinta iyo gurmadka. Militariga Mareykanka ayaa sheegay in tababarku uu ka caawiyay ciidamada inay hagaajiyaan isku-duwidda iyo qorsheynta lagu xoojinayo saldhigyada haddii xaalad degdeg ahi timaado.
White ayaa tababarka ku tilmaamay mid guuleystay, isagoo sheegay in ciidamada gurmadka ay muujiyeen awood ay waqti kooban ugu gaari karaan goob kasta oo looga baahdo.
