Wararka24: Cabdullaahi Maxamed Nuur, oo dhawaan iska casilay xilkii la-taliyaha sare ee Madaxweynaha Soomaaliya, ayaa caawa ku biiray shirka siyaasiyiinta mucaaradka uga socda magaalada Muqdisho, tallaabo muujineysa isbeddel siyaasadeed oo cusub.
Cabdullaahi ayaa ka mid noqday xubno siyaasiyiin ah oo ka baxay garabka Villa Soomaaliya kuna biiray mucaaradka, xilli dalka uu wajahayo xiisad siyaasadeed oo la xiriirta doorashooyinka iyo kala guurka siyaasadeed.
Wareysi kooban oo uu bixiyay kadib ka qeyb-galkiisa shirka, Cabdullaahi Maxamed Nuur ayaa sheegay in isaga iyo Madaxweyne Xasan Sheekh Maxamuud ay ku kala tageen qaabka loo wajahayo danaha guud ee dalka.
Wuxuu sheegay in xiriir saaxiibtinimo uu horey ula lahaa madaxweynaha, balse uu rumeysan yahay in danta guud ee shacabka iyo dalka ay ka muhiimsan tahay xiriir kasta oo shaqsiyeed, taasina ay sababtay kala aragti duwanaanshahooda.
Cabdullaahi ayaa ka gaabsaday inuu si cad u faahfaahiyo qodobada ugu waaweyn ee ay isku seegeen madaxweynaha, inkastoo ay jiraan warar siyaasadeed oo la xiriirinaya arrimaha doorashada Hirshabelle iyo saameynta dowladda federaalka ku leedahay maamulkaasi.
Maalmihii la soo dhaafay waxaa sidoo kale mucaaradka kusoo biiray siyaasiyiin kale oo horey uga tirsanaa garabka dowladda, kuwaas oo sheegay inay ka biyo diideen jihada siyaasadeed ee hadda loo wado dalka.
Mucaaradka ayaa maalmahan waday shirar joogto ah oo looga arrinsanayo xaaladda siyaasadeed iyo qorshaha dibadbaxa weyn ee la filayo inuu ka dhaco Muqdisho 10-ka bishan, iyadoo ay weli taagan tahay rejo-xumo ku saabsan gogosha wada-hadal ee uu fidiyay Madaxweyne Xasan Sheekh.
DAAWO
