Wararka24: Wararka laga helayo magaalada Baydhabo ayaa sheegaya in Guddoomiyaha Golaha Shacabka ahna hoggaamiyaha Koonfur Galbeed, Aadan Maxamed Nuur Aadan Madoobe, uu Dowladda Federaalka ka dalbaday in General Cabdullaahi Aadan Xuseen Cirro dib loogu soo diro Baydhabo.
Sida wararku sheegayaan, Aadan Madoobe ayaa doonaya in General Cirro uu door ka qaato sugidda amniga iyo difaaca magaalada Baydhabo, xilli magaalada ay ka taagan yihiin xiisado siyaasadeed iyo amni.
Dowladda Federaalka ayaa hore General Cirro muddo bil ah u xil saartay amniga Baydhabo, laga bilaabo 15-kii May, iyadoo xilkaasi uu la xiriiray diyaar-garowga doorashadii hoggaamiyaha Koonfur Galbeed ee 10-kii June uu ku guuleystay Aadan Madoobe.
Intii uu Baydhabo ku sugnaa, Aadan Madoobe ayaa hore u ammaanay waxqabadka General Cirro ee dhinaca amniga iyo doorkii uu ka qaatay xasilloonida magaalada.
Wararka ayaa intaas ku daraya in General Cirro uu tan iyo bartamihii June ka maqnaa Baydhabo, kaddib markii Dowladda Federaalka ay magaalada kasoo celisay. Waxaa sidoo kale la sheegay in xilligaas loo qorsheeyay inuu qabto xilka Taliyaha Qaybta 21-aad ee Ciidanka Xoogga Dalka ee Dhuusamareeb, balse uu ka cudurdaartay.
Sida wararkaasi sheegayaan, General Cirro wuxuu diidmadaas ku sababeeyay inuusan doonayn inuu ku milmo khilaaf siyaasadeed iyo maamul oo xilligaas ka jiray Galmudug, gaar ahaan khilaafka u dhexeeyay Dowladda Federaalka iyo maamulka Galmudug.
General Cirro, oo muddooyinkii u dambeeyay kamid ahaa saraakiisha sare ee Ciidanka Xoogga Dalka, ayaa sidoo kale la sheegay inuu muddo ku maqnaa xarumaha ciidamada, inkastoo aanay Dowladda Federaalka soo saarin war rasmi ah oo caddeynaya xilka uu hadda hayo.
Aadan Madoobe ayaa la fahamsan yahay inuu xiriir dhow la leeyahay Dowladda Federaalka, iyadoo maamulka uu hoggaamiyo uu taageero siyaasadeed iyo mid amni ka helayo dowladda dhexe.
Wararka ayaa sheegaya in dalabka Aadan Madoobe ee ku aaddan in General Cirro dib loogu celiyo Baydhabo aan weli laga bixin jawaab rasmi ah. Lama oga haddii dowladda ay aqbali doonto codsiga hoggaamiyaha Koonfur Galbeed.
