Wararka24: Hoggaamiyaha Dowladda Koonfur Galbeed Soomaaliya, Sheekh Aadan Maxamed Nuur (Aadan Madoobe), ayaa maanta kulan la yeeshay xubnihii Golaha Wasiirrada ee hore iyo wasiirrada cusub, isagoo uga mahadceliyay masuuliyiintii hore shaqadii ay soo qabteen, isla markaana tilmaamay in khibraddooda looga faa’iideysan doono horumarinta dowladnimada iyo adeegyada bulshada.
Kulanka uu la qaatay wasiirradii hore ayaa lagu bogaadiyay kaalintii ay ka qaateen dhismaha hay’adaha dowladda iyo horumarinta maamulka Koonfur Galbeed. Wasiirradii hore ayaa dhankooda muujiyay inay sii wadi doonaan taageerada ay u hayaan maamulka cusub, kana qeyb qaadan doonaan dadaallada lagu xoojinayo nabadda, dib-u-heshiisiinta, midnimada bulshada iyo horumarka deegaannada.
Hoggaamiyaha Koonfur Galbeed ayaa sidoo kale kulan gaar ah la yeeshay Golaha Wasiirrada cusub, isagoo kala hadlay mudnaanta horyaalla xukuumadda iyo sidii loo dardargelin lahaa fulinta qorshayaasha horumarineed. Kulanka ayaa diiradda lagu saaray xoojinta wada-shaqeynta hay’adaha dowladda, horumarinta adeegyada bulshada, adkeynta maamul-wanaagga iyo isku dubbaridka qorshayaasha wasaaradaha.
Aadan Madoobe ayaa wasiirrada cusub ku boorriyay inay waajibaadkooda u gutaan si hufan oo daacadnimo ku dheehan tahay. Wuxuu sidoo kale faray inay mudnaan siiyaan adeegyada bulshada, isla-xisaabtanka iyo hirgelinta barnaamijyada horumarineed ee dowladda, si loo daboolo baahiyaha shacabka.
Wasiirrada cusub ayaa uga mahadceliyay hoggaamiyaha kalsoonida uu siiyay, iyagoo ballanqaaday inay si wadajir ah uga shaqeyn doonaan horumarinta hay’adaha dowladda, kor u qaadidda adeegyada bulshada iyo xaqiijinta qorshayaasha horumarineed ee Dowladda Koonfur Galbeed.
