Wararka24: Wararka laga helayo gobolka Baay ayaa sheegaya in duqeyn diyaaradeed ay ka dhacday duleedka magaalada Baydhaba, halkaas oo la sheegay inay howlgal ka fuliyeen diyaaradaha dagaalka F-16.
Dadka deegaanka ayaa sheegay inay maqleen jugta gantaallo culus, balse weli si rasmi ah looma xaqiijin khasaaraha ama waxyeellada ka dhalatay duqeyntaasi.
Duqeynta ayaa ku soo beegmaysa xilli ciidamada dowladda ay xoojiyeen howlgalada amniga ee ka socda daafaha Baydhaba, iyadoo la adkeeyay ammaanka magaalada inta lagu jiro qabanqaabada munaasabadda caleemo-saarka Madaxweynaha Koonfur Galbeed, Sheekh Aadan Maxamed Nuur (Aadan Madoobe).
Wararka ayaa tilmaamaya in ciidamada taabacsan Cabdicasiis Lafta-gareen ay ku sugan yihiin deegaanno ka baxsan magaalada, halka kooxda Al-Shabaab ay sidoo kale weli ka jirto halis amni oo ka taagan qaybo kamid ah gobolka.
Ilo wareedyo deegaanka ah ayaa sheegay in aan weli la caddeyn bartilmaameedka duqeynta, mana jiro war rasmi ah oo kasoo baxay hay’adaha amniga oo faahfaahin ka bixiyay howlgalka.
Magaalada Baydhaba waxaa haatan ku sugan madax iyo wafuuud kala duwan oo ka qeyb galaya munaasabadda caleemo-saarka Madaxweynaha cusub ee Koonfur Galbeed. Waxaa ka mid ah Ra’iisul Wasaaraha Soomaaliya, Xamza Cabdi Barre, oo maanta gaaray magaalada.
Waxaa sidoo kale la filayaa in saacadaha soo socda uu Baydhaba gaaro Madaxweynaha Jamhuuriyadda Federaalka Soomaaliya, Xasan Sheekh Maxamuud, si uu uga qeyb galo munaasabadda caleemo-saarka oo la filayo inay noqoto mid si heer sare ah loo soo agaasimay.
