Wararka24: Diyaaradaha dagaalka ee Turkiga, gaar ahaan kuwa F-16 ee loogu deeqay ciidamada cirka Soomaaliya ayaa maanta ka qeyb qaatay munaasabadda xuska 66-guurada 1-da Luulyo, iyagoo bandhig hawada ah ka sameeyay magaalada Muqdisho.
Bandhigga ayaa qeyb ka ahaa dabaal-degga maalinta xorriyadda, waxaana diyaaradaha lagu arkay iyagoo dul maraya qaybo ka mid ah caasimadda, xilli ay shacabka iyo madaxda qaranka ka daawanayeen munaasabadda ka socotay Taalada Daljirka Dahsoon.
Diyaaradahaasi ay sameeyeen dhoolla-tus hawada ah oo ay ku xambaarsanaayeen astaamo la xiriira maalmaha xorriyadda iyo calanka Soomaaliya.
Saraakiil ka tirsan Ciidanka Cirka Soomaaliyeed ayaa sheegay in ka qeybgalka bandhigga uu muujinayo horumarka lagu sameeyay dib u dhiska awoodda ciidamada cirka, kuwaas oo sanadihii dambe dib loo tayeynayay.
Madaxweynaha Soomaaliya Xasan Sheekh Maxamuud, Ra’iisul Wasaare Xamza Cabdi Barre iyo masuuliyiin kale oo ka tirsan dowladda ayaa goobjoog ka ahaa munaasabadda, iyagoo daawanayay bandhigyada ay soo diyaariyeen ciidamada qalabka sida.
Sidoo kale, munaasabadda waxaa qeyb ka ahaa cutubyo ka tirsan ciidamada qalabka sida, gaadiid ciidan iyo fardo, kuwaas oo socod ku maray waddooyinka muhiimka ah ee magaalada Muqdisho.
Xuska sanadkan ayaa ku soo aaday xilli dowladda Soomaaliya ay sheegtay inay sii waddo qorshayaasha lagu horumarinayo tayada ciidamada iyo qalabka ay isticmaalaan, iyadoo la xoojinayo awoodaha amniga iyo difaaca qaranka.
