Wararka24: Ammaanka magaalada Baydhaba ee xarunta gobolka Baay ayaa si weyn loo adkeeyay, iyadoo lagu wado inay martigeliso munaasabadda caleemo-saarka Madaxweynaha cusub ee Koonfur Galbeed Soomaaliya, Sheekh Aadan Maxamed Nuur (Aadan Madoobe).
Ciidamo dheeraad ah ayaa la geeyay gudaha magaalada iyo daafaheeda, waxaana la kordhiyay howlgallada lagu xaqiijinayo amniga si loo sugo habsami u socodka munaasabadda. Ilo deegaanka ah ayaa sheegay in dhaq-dhaqaaqyo amni oo ballaaran laga dareemayo Baydhaba iyo deegaannada ku dhow.
Wararka ayaa intaas ku daraya in diyaarado dagaal iyo diyaaradaha aan duuliyaha lahayn ee loo yaqaan Drones-ka ay ka qeyb qaadanayaan hawlaha amniga, iyadoo si joogto ah loola socdo xaaladda magaalada iyo hareeraheeda.
Tallaabooyinkan ayaa la sheegay inay qeyb ka yihiin dadaallada looga hortagayo isku day kasta oo lagu carqaladeyn karo munaasabadda caleemo-saarka. Gobolka Baay ayaa kamid ah goobaha ay weli ka jiraan khataraha amni ee ka dhasha weerarrada Al-Shabaab iyo xiisadaha siyaasadeed ee gudaha.
Madaxweyne Xasan Sheekh Maxamuud ayaa la filayaa inuu gaaro magaalada Baydhaba si uu uga qeyb galo munaasabadda, waxaana horay halkaasi u gaaray wafdi hordhac ah oo ka socda dowladda federaalka.
Mas’uuliyiin heer federaal iyo heer dowlad-goboleed ah ayaa sidoo kale ku sugan Baydhaba, waxaana la filayaa inay ka qeyb galaan xafladda caleemo-saarka. Magaalada ayaa maalmahan martigelineysay wufuud kala duwan oo u socda ka qeybgalka munaasabadda.
Waxaa kamid ah mas’uuliyiinta Baydhaba gaaray qaar ka tirsan madaxda dowlad-goboleedyada, xubno ka socda baarlamaanka federaalka iyo maamulka Gobolka Banaadir, kuwaas oo kulamo la yeeshay madaxda cusub ee Koonfur Galbeed.
Xafladda caleemo-saarka Sheekh Aadan Madoobe ayaa la filayaa inay noqoto mid si weyn loo soo agaasimay, iyadoo maamulka Koonfur Galbeed uu sheegay in la qaaday dhammaan tallaabooyinka lagu sugayo amniga iyo soo dhaweynta martida ka qeybgaleysa munaasabadda.
