Wararka24: Jaamacadda Carabta ayaa cambaareysay booqashadii Madaxweynaha Somaliland, Cabdiraxmaan Maxamed Cabdullaahi (Cirro), uu ku tagay magaalada Qudus iyo tallaabooyinka la xiriira furitaanka dhisme loogu magac daray safaarad. Bayaan kasoo baxay ururka ayaa lagu sheegay in arrintaasi aysan waafaqsanayn mabda’a Jaamacadda Carabtu ayna qireysa midnimada iyo wadajirka dhuleed ee Soomaaliya.
Xoghayaha Guud ee Jaamacadda Carabta, Ahmed Aboul Gheit, ayaa sheegay in tallaabadaasi ay tahay mid aan sharciyad caalami ah lahayn. Bayaanka ayaa xusay in ficillada noocan oo kale ah ay dhaawici karaan dadaallada lagu ilaalinayo xasilloonida gobolka iyo wadajirka Jamhuuriyadda Federaalka Soomaaliya.
Jaamacadda Carabta ayaa sidoo kale sheegtay in tallaabadaasi ay ka hor imanayso mabaadi’da ku xusan Axdiga Qaramada Midoobay iyo qawaaniinta caalamiga ah. Ururku wuxuu ugu baaqay masuuliyiinta Somaliland inay dib u eegaan siyaasadaha la xiriira arrintan, isagoo ku adkeeyay muhiimadda ay leedahay in xalalka siyaasadeed lagu raadiyo wada-hadal iyo is-afgarad.
Dhanka kale, afhayeenka Xoghayaha Guud ee Jaamacadda Carabta, Jamal Rushdi, ayaa dib u xaqiijiyay taageerada ururka uu u hayo madax-bannaanida, midnimada iyo wadajirka dhuleed ee Soomaaliya. Wuxuu sheegay in ururku si joogto ah ula socdo horumarka arrimaha la xiriira Somaliland iyo saameynta ay ku yeelan karaan gobolka.
Bayaanka ayaa sidoo kale lagu xusay in Golaha Jaamacadda Carabtu hore uga digay dhaqdhaqaaq kasta oo la xiriira aqoonsi ama xiriir diblomaasiyadeed oo gaar ah oo lala yeesho Somaliland. Sida lagu sheegay qoraalka, tallaabooyinka noocaas ah waxay saameyn ku yeelan karaan amniga gobolka Badda Cas, Gacanka Cadmeed iyo guud ahaan Geeska Afrika.
Jaamacadda Carabta ayaa ugu dambeyn sheegtay inay sii wadi doonto dadaallada lagu mideynayo mowqifka dalalka Carabta, kuwa Afrika iyo beesha caalamka si loo ilaaliyo madaxbannaanida iyo midnimada Soomaaliya. Ururku wuxuu ku baaqay in dhammaan dhinacyada Soomaalida ay mudnaanta siiyaan wada-hadal iyo xal nabadeed oo lagu wajaho arrimaha taagan.
