Wararka24: Warar laga helayo gobolka Shabeellaha Dhexe ayaa sheegaya in iska horimaad hubeysan uu xalay ka dhacay deegaanno ku dhow degmada Warsheekh, dagaalka aya u dhexeya Ciidanka Xoogga Dalka iyo ciidamo taabacsan Wasiirkii hore ee Amniga Soomaaliya, Cabdullaahi Maxamed Nuur.
Ilo wareedyo ayaa sheegay in ciidamo lala xiriirinayo Wasiirkii hore ee Amniga Soomaaliya Cabdullaahi Maxamed Nuur ay ka dhaqaaqeen degmada Gubadley ee gobolka Banaadir, iyagoo ku sii jeeday deegaanno ka tirsan Shabeellaha Dhexe. Wararka ayaa intaas ku daraya in ciidamadaasi ay wateen gaadiid dagaal.
Sida xogaha la helayo tilmaamayaan, ciidamada Dowladda Federaalka ee ka hawlgala koonfurta gobolka Shabeellaha Dhexe ayaa la socday dhaqdhaqaaqaasi. Waxaa la sheegay in ciidamadu xoojiyeen amniga waddooyinka mara deegaannada Ceel-Bashaqle iyo Qorilow oo hoostaga degmada Warsheekh.
Wararka hordhaca ah ayaa sheegaya in iska horyimaadka uu ka dhacay aagga Ceel-Bashaqle kadib markii ciidamada socdaalka ahaa ay la kulmeen ciidamo ku sugnaa waddada. Ilaa hadda ma jiro war rasmi ah oo xaqiijinaya khasaaraha ka dhashay iska horimaadkaasi.
Sidoo kale, warar kala duwan ayaa kasoo baxaya halka ay ku dambeeyeen ciidamada iyo gaadiidka lagu sheegay inay ku lug lahaayeen dhacdada. Qaar ka mid ah xogaha aan la xaqiijin ayaa sheegaya in ciidamada ay gaaren deegaanno kala duwan oo ka tirsan gobolka, halka warar kale ay tilmaamayaan in gaadiid lagu qabtay howlgalka.
Saraakiisha Ciidanka Xoogga Dalka Soomaaliyeed iyo Taliska Booliska Gobolka Banaadir ayaan weli soo saarin war rasmi ah oo ku saabsan dhacdada. Dowladda Federaalka ayaa dhinaceeda sii wada howlgallada lagu ururinayo hubka sharci darrada ah ee laga fulinayo qaybo kamid ah Muqdisho.
Dhacdadan ayaa kusoo aadeysa xilli ay weli taagan yihiin khilaafaad siyaasadeed oo la xiriira arrimaha doorashooyinka, dastuurka iyo hannaanka siyaasadeed ee dalka. Dadaallo lagu doonayo in wada hadal lagu xalliyo murannada jira ayaa weli socda, iyadoo dhinacyada siyaasadda ay soo bandhigayaan aragtiyo kala duwan.
