Wararka24: Xukuumadda Federaalka Soomaaliya ayaa shaacisay qorshe cusub oo lagu soo dhoofsanayo koronto laga keenayo dalka Itoobiya, iyadoo dowladda ay sheegtay in mashruucan uu si weyn hoos ugu dhigi doono qiimaha korontada ee gudaha dalka.
Wasiirka Tamarta iyo Kheyraadka Biyaha, Cabdullaahi Bidhaan Warsame ayaa sheegay in dowladda ay rajo wanaagsan ka qabto in Soomaaliya ay hesho koronto qiimaheedu yahay halkii kilowatt 5 cent oo dollar ah, taas oo aad uga hooseysa qiimaha hadda laga bixiyo magaalooyinka dalka.
Wasiirka ayaa tilmaamay in korontada laga keenayo Itoobiya ay soo mari doonto saddex magaalo oo muhiim ah oo ku yaalla xuduudaha Soomaaliya, kuwaas oo kala ah Doolow, Wajaale iyo Goldogob. Wuxuu sidoo kale sheegay in laba kamid ah goobaha mashruuca ay horey u dhammaadeen, islamarkaana uu socdo diyaar garowga wajiyada kale ee mashruuca.
Mashruucan waxaa taageeraya World Bank, oo horay u sheegay in Soomaaliya ay kamid tahay waddamada ugu qaalisan dhanka korontada ee qaaradda Afrika, iyadoo magaalooyinka qaar laga bixiyo inta u dhaxeysa 60 illaa 100 cent halkii kilowatt.
Dhanka kale, Itoobiya ayaa hadda soo saarta in ka badan 6,000 megawatt oo koronto ah, taas oo inta badan laga dhaliyo mashaariicda biyaha, gaar ahaan mashruuca weyn ee Grand Ethiopian Renaissance Dam.
Mashruuca isku xirka korontada ee Soomaaliya iyo Itoobiya ayaa qeyb ka ah dadaallo ballaaran oo ay waddamada Geeska Afrika ku doonayaan inay ku xoojiyaan iskaashiga tamarta iyo isku xirka dhaqaalaha gobolka.
Dowladda Soomaaliya ayaa aaminsan in tallaabadan ay wax weyn ka tari doonto yareynta koronto la’aanta baahsan ee dalka, islamarkaana ay kor u qaadi doonto helitaanka tamar jaban oo ay ka faa’iideysan karaan shacabka iyo ganacsiyada gudaha.
