Wararka24: Magaalada Baydhabo ee xarunta gobolka Baay waxaa kusii qulqulaya saraakiil sare oo ka tirsan Ciidamada Xoogga Dalka Soomaaliyeed, kuwaas oo loo diray inay ka qeyb qaataan sugidda amniga iyo diyaar garowga doorashooyinka maamulka Koonfur Galbeed.
Kaaliyaha Taliska Ciidanka Xoogga Dalka, Janaraal Maadey Nuurey Sheekh ayaa maanta gaaray Baydhabo, waxaana garoonka diyaaradaha Shaati Gaduud kusoo dhaweeyay Kaaliyaha Taliska Ciidanka Dhulka, Janaraal Cabdullaahi Aadan Xuseen (Cirro) iyo saraakiil kale oo ka tirsan qeybta 60-aad ee ciidanka.
Saraakiishan ayaa lagu wadaa inay door muhiim ah ka qaataan xoojinta amniga magaalada, xilli Baydhabo ay marti-gelinayso doorashada guddoonka Golaha Wakiilada iyo tan Madaxweynaha cusub ee maamulka Koonfur Galbeed Soomaaliya.
Wararka laga helayo magaalada ayaa sheegaya in ciidamada la geeyay ay isugu jiraan qeybta 60-aad ee Ciidamada Xoogga Dalka, Kumaandooska Gorgor iyo ciidamo Booliis ah, iyadoo sidoo kale la kordhiyay goobaha hubinta gaadiidka ee laga galo gudaha iyo bannaanka Baydhabo.
Janaraal Maadey Nuurey Sheekh ayaa sidoo kale la filayaa inuu ka qeyb galo kulamo looga hadlayo xaaladda amniga, xasilinta magaalada iyo qorshaha doorashooyinka maamulka Koonfur Galbeed, maadaama uu socdo diyaar garowgii ugu dambeeyay ee arrimahaasi.
Dhanka kale, Dowladda Federaalka Soomaaliya ayaa dhawaan magacowday taliyaha cusub ee guutada 8-aad ee qeybta 60-aad, kadib markii weerar ay Al-Shabaab ka geysteen duleedka Baydhabo lagu dilay ku-simihii taliyaha qeybta 60-aad Gaashaanle Sare Yoonis Aadan iyo taliyihii guutada 8-aad Cali Caddow.
Magacaabista cusub iyo qulqulka saraakiisha ciidamada ayaa kusoo aadaya xilli maamulka Koonfur Galbeed uu wajahayo xaalad siyaasadeed iyo mid amni oo si dhow isha loogu hayo.
