Wararka24: Wararka laga helayo gobolka Baay ayaa sheegaya in ciidamo taabacsan madaxweynihii hore ee Koonfur Galbeed ay ka baxeen deegaanka Awdiinle, iyagoo u gudbay dhanka gobolka Gedo.
Muuqaallo lagu baahiyay baraha bulshada ayaa muujinaya ciidamo wata gaadiid dagaal oo gaaraya degmada Doolow, taas oo dhalisay hadal-heyn siyaasadeed iyo amni. Dhaqdhaqaaqan ayaa imaanaya xilli ay weli taagan tahay xiisadda ka dhalatay isbeddelladii ka dhacay Koonfur Galbeed.
Danjiraha Soomaaliya ee Tanzania Ilyaas Cali Xasan ayaa sheegay in hubkii maamulka Koonfur Galbeed lagu arkay Doolow, isagoo arrintaas ku tilmaamay mid laga xumaado. Wuxuu ugu baaqay mas’uuliyiinta iyo shacabka Gedo inay ka shaqeeyaan sidii hubkaas loogu soo celin lahaa gacanta maamulka.
Danjiraha ayaa sidoo kale xusay in hubkaasi lagu iibiyay canshuurta shacabka, taas oo ka dhigaysa in loo baahan yahay in si degdeg ah loo maareeyo xaaladda. Hadalkiisa ayaa kusoo aadaya iyadoo dood adag ay ka taagan tahay dhaq-dhaqaaqa ciidamada.
Baxsashada ciidamadan ayaa timid kadib markii ay hore u sheegeen in aysan oggolaan doonin doorasho lagu qabto Baydhaba, isla markaana ay ka hortagi doonaan qorshe kasta oo lagu soo dhisayo hoggaan cusub.
Si kastaba, xaaladda guud ee Awdiinle iyo Baydhaba ayaa lagu soo waramayaa inay deggan tahay, iyadoo ciidamada dowladda Federaalka ay halkaasi ka wadaan howlgal lagu sugayo amniga.
