Wararka24: Ra’iisul Wasaaraha Soomaaliya Xamsa Cabdi Barre ayaa maanta soo saaray wareegto uu ku magacaabay wasiirka cusub ee Wasaaradda Warfaafinta, Dhaqanka iyo Dalxiiska, iyadoo tallaabadan ay qeyb ka tahay isbeddellada ka socda xukuumadda federaalka.
Ra’iisul Wasaaraha ayaa xilkaasi u magacaabay Cabdifataax Qaasim Maxamuud, kadib markii uu tixraacay qodobka 120-aad ee Dastuurka Federaalka, isla markaana uu la tashaday Madaxweynaha Jamhuuriyadda Federaalka Soomaaliya.
Cabdifataax Qaasim Maxamuud ayaa beddelaya Daud Aweis Jama, oo ka mid ahaa wasiirradii ugu muddada dheeraa ee ka tirsanaa xukuumaddan, isla markaana muddo dheer hoggaaminayay wasaaradda warfaafinta.
Ra’iisul Wasaare Xamsa Cabdi Barre ayaa wasiirka cusub kula dardaarmay inuu muujiyo xilkasnimo, hufnaan iyo dadaal dheeraad ah si loo dardargeliyo howlaha muhiimka ah ee horyaalla wasaaradda, gaar ahaan xoojinta warbaahinta dowladda iyo horumarinta dhaqanka iyo dalxiiska.
Cabdifataax Qaasim ayaa horey xilal kala duwan uga soo qabtay dowladda federaalka, waxaana 21-kii May 2025 xilka looga qaaday wasiir ku xigeenkii wasaaradda gaashaandhigga, xilli aan si rasmi ah loo shaacin sababta xil ka qaadistaas.
Magacaabistan cusub ayaa imaneysa xilli dowladda federaalka ay waddo dib-u-habeyn iyo dardargelin lagu xoojinayo waxqabadka hay’adaha dowladda, iyadoo la filayo in wasiirka cusub uu si rasmi ah xilka ula wareego maalmaha soo socda.
