Wararka24: Wasiirka Caafimaadka ee dowladda Kenya, Aden Barre Ducale, ayaa mar kale ku baaqay in dib loo furo xadka u dhexeeya Kenya iyo Soomaaliya, isagoo sheegay in xirnaanshaha muddada dheer uu saameyn ku yeeshay dhaqaalaha iyo dakhliga dowladda.
Duale oo ka hadlay munaasabad ka dhacday degmada Garissa ayaa sheegay in dhaqdhaqaaqa dadka iyo ganacsiga uu weli socdo, inkastoo xadka si rasmi ah u xiran yahay. Wuxuu xusay in xaaladdan ay ka dhigan tahay in dowladda ay lumisay fursado dhaqaale iyo nidaam sharciyeed oo lagu maamulo isu-socodka.
Wasiirka ayaa sheegay in dib u furista xadka ay dowladda u abuuri karto dakhli dheeraad ah, halka hay’adaha socdaalka ay heli lahaayeen awood dheeraad ah oo ay ku xaqiijiyaan dadka ka gudbaya xadka. Wuxuu tilmaamay in nidaamka hadda jira aanu si buuxda u shaqeynayn.
Sidoo kale, Duale ayaa sheegay inuu arrintan kala hadlay Madaxweynaha Kenya William Ruto, isagoo muujiyay rajo ah in dhawaan dib loo furi doono goobaha rasmiga ah ee laga gudbo xadka labada dal.
Wuxuu ku dooday in dib u furista xadka ay dib u soo noolayn karto dhaqaalaha gobollada Waqooyi Bari ee Kenya, gaar ahaan ganacsiga xuduudaha, isla markaana ay xoojin karto xiriirka dhaqaale ee labada dhinac.
Horaantii sanadkan, Madaxweyne Ruto ayaa hore u sheegay in dowladda Kenya ay ka shaqeyneyso qorshe lagu furayo xadka, si loo kobciyo ganacsiga loona fududeeyo isu-socodka bulshada labada dal.
Xadka Kenya iyo Soomaaliya ayaa xirnaa muddo ka badan toban sano sababo la xiriira arrimo amni, hase yeeshee baaqyada dib loogu furayo ayaa sii kordhaya, iyadoo la doonayo in dib loo soo celiyo dhaqdhaqaaqii ganacsi ee hore uga jiray xadka.
