Wararka24: Ciidamo aad u hubeysan ayaa maanta lagu daadiyay xaafadaha magaalada Baydhabo, iyadoo si weyn loo adkeeyay ammaanka guud ee magaalada.
Ilo deegaanka ah ayaa sheegay in ciidamadan oo intooda badan wajiyada qarsaday ay xaddideen dhaqdhaqaaqa gaadiidka iyo dadweynaha, isla markaana ay xireen qaybo kamid ah waddooyinka muhiimka ah.
Goobjoogayaal ayaa sheegay in ciidamada lagu arkayo meelo badan oo magaalada ah, iyagoo wata gaadiid dagaal islamarkaana si gaar ah u ilaaliyay xarumaha dowladda iyo waddooyinka gala madaxtooyada Koonfur Galbeed.
Ujeedka rasmiga ah ee ka dambeeya tallaabadan weli si cad looma shaacin, balse warar ayaa sheegaya inay la xiriirto qorshe doorasho oo ka socda magaalada Baydhabo.
Warar kale ayaa tilmaamaya in maamulka Koonfur Galbeed uu wajahayo culays dhinaca amniga ah, taas oo keentay in la kordhiyo ciidamada lagu sugan magaalada.
Dhanka kale, waxaa jira warar sheegaya dhaqdhaqaaqyo ciidan oo ka socda duleedka Baydhabo, kuwaas oo la xiriira kooxo mucaarad ah, inkastoo aan si rasmi ah loo xaqiijin.
Dadka deegaanka ayaa muujinaya cabsi ku aaddan xaaladda amni, iyagoo ka baqaya in xiisadda jirta ay isu beddesho iska hor imaad hubeysan.
DAAWA
