Wararka24: Wasiirka Warfaafinta ee maamulka Koonfur Galbeed, Maxamed Ibraahim Bilaal, ayaa beeniyay warar baraha bulshada lagu faafiyay oo sheegaya in xalay dagaal ka dhacay magaalada Baydhabo.
Wasiirka ayaa sheegay in xaaladda Baydhabo ay deggan tahay, isla markaana nolol maalmeedka magaalada uu si caadi ah u socdo, inkastoo warar kale ay sheegayaan in hoobiye lagu tuuray mid ka mid ah saldhigyada ciidanka maamulka, kaddibna ciidamadu ay rasaas ku jawaabeen. “Baydhabo rasaas kama dhicin.
Aniga laftaydu bartamaha magaalada ayaan joogaa,” ayuu yiri wasiirku, isagoo si cad u diiday wararka sheegaya in kooxo hubeysan ay weerar ku qaadeen ciidanka amniga.
Wasiirka ayaa sidoo kale ku eedeeyay kooxo ku sugan magaalada Muqdisho inay faafinayaan warar uu ku tilmaamay “been iyo dacaayad,” isaga oo sheegay in ujeedadu tahay in la abuuro cabsi iyo jahawareer.
Sidoo kale, wasiirku wuxuu caddeeyay in Madaxweynaha maamulka Koonfur Galbeed uu ku sugan yahay magaalada barakeysan ee Makka, halkaas oo uu ku gudanayo cibaadada Cumrada, isla markaana xiriirka u dhexeeya dowlad-goboleedka iyo dowladda federaalka uu caadi yahay.
Si kastaba ha ahaatee, warar kale ayaa sheegaya in xiisad u dhaxaysa Dowladda Federaalka iyo Koonfur Galbeed ay soo kordhayso, iyada oo khilaafyo soo noqnoqday ay weli ka dhex taagan yihiin labada dhinac.
