Wararka24: Ciidamada gaarka ah ee Kenya ayaa fashiliyey isku day ay dagaalyahanno ka tirsan Al-Shabaab ku doonayeen inay kaga soo gudbaan xadka Kenya ee gobolka Mandera, kadib howlgal ay ku fuliyeen xog sirdoon oo ay heleen.
Laanta la dagaallanka argagixisada ee Kenya ayaa sheegtay in ciidamada ay weerar gaadmo ah ku qaadeen kooxda, xilli ay socdeen dabaaldegyada Ciidda, iyadoo lagu beegsaday duleedka deegaanka Sarira.
War-saxaafadeedka ayaa lagu sheegay in laba ka mid ah dagaalyahannada la dilay, afar kalena ay dhaawacmeen, halka xubnihii kale ay dib ugu carareen gudaha Soomaaliya kadib rasaas culus oo lagu furay.
Howlgalkan ayaa kusoo aadaya xilli dowladda Kenya ay qorsheyneyso inay dib u furto xadka Mandera bisha Abriil, kadib sanado badan oo uu xirnaa.
Madaxweynaha Kenya William Ruto ayaa horay u sheegay in xirnaanshaha xadka uu saameyn ku yeeshay nolosha shacabka iyo ganacsiga, isagoo ballan qaaday in la xoojin doono ammaanka si loo fududeeyo furitaanka xadka.
Ruto ayaa sidoo kale ugu baaqay bulshada deegaanka inay la shaqeeyaan hay’adaha amniga, isla markaana ay bixiyaan xog kasta oo ka hortagi karta khataraha amni.
Xadka u dhexeeya Kenya iyo Soomaaliya ayaa la xiray sanadkii 2011, kadib weerarro ay Al-Shabaab ka fulisay gudaha Kenya, iyadoo dadaallo hore oo dib loogu furayay aysan hirgelin.
