Wararka24: Guddoomiyaha Golaha Shacabka Baarlamaanka Soomaaliya Sheekh Aadan Maxamed Nuur Madoobe ayaa Muqdisho kulan kula yeeshay odayaasha dhaqanka iyo waxgaradka Koonfur Galbeed, iyadoo laga hadlay xaaladda kacsan ee ka taagan deegaanada maamulkaasi.
Kulanka waxaa sidoo kale ka qeyb galay wasiirro iyo xildhibaanno kasoo jeeda Koonfur Galbeed, waxaana diiradda lagu saaray sidii xal waara loogu heli lahaa xiisadda iyo dagaallada ka socda deegaanadaasi.
Odayaasha dhaqanka ayaa guddoomiyaha la wadaagay xaaladda dhabta ah ee jirta, iyagoo muujiyay muhiimadda ay leedahay in si degdeg ah loo helo xal lagu dejiyo xaaladda.
Sheekh Aadan Madoobe ayaa uga mahadceliyay odayaasha doorkooda, wuxuuna ku booriyay inay sii xoojiyaan dadaallada ku aaddan adkeynta dowladnimada iyo horumarinta deegaanada Koonfur Galbeed.
Kulankan ayaa kusoo aadaya xilli guddoomiyaha horey looga hor istaagay safar uu ku tegi lahaa Baydhaba, kadib markii maamulka Koonfur Galbeed uu diiday in wafdi uu hoggaaminayay ay ka degaan garoonka magaaladaasi.
Xiisadda u dhexeysa Dowladda Federaalka iyo Koonfur Galbeed ayaa isku beddeshay gacan ka hadal, kadib dagaallo ka dhacay deegaanno ka tirsan maamulkaasi.
Xaaladda ayaa weli ah mid kacsan, iyadoo ay jiraan dhaq dhaqaaqyo siyaasadeed iyo kuwo ciidan oo muujinaya in khilaafku galay marxalad xasaasi ah.
