Wararka24: Guddoomiyaha Baarlamaanka Dowlad Goboleedka Koonfur Galbeed Cali Fiqi ayaa si kulul uga hadlay ciidamo ay Dowladda Federaalka Soomaaliya u dirtay magaalada Baraawe, isagoo ku tilmaamay tallaabadaasi mid khatar ku ah nidaamka federaalka.
Cali Fiqi ayaa sheegay in arrintan aysan ahayn dhaqdhaqaaq ciidan oo caadi ah, balse ay si toos ah u saameyneyso xasilloonida siyaasadeed ee dalka, isla markaana ay keeni karto khilaaf hor leh.
Wuxuu xusay in nidaamka federaalka Soomaaliya loo dhisay si looga hortago isku dhacyo noocan oo kale ah, islamarkaana loo ilaaliyo wada shaqeynta dowladda dhexe iyo dowlad goboleedyada.
Guddoomiyaha ayaa sheegay in dadka Koonfur Galbeed ay u arkaan tallaabadan mid halis ku ah jiritaankooda, halkii ay ka ahaan lahayd hoggaan ama taageero.
Wuxuu sidoo kale ka digay in ciidanka qaranka lagu dhex daro arrimo siyaasadeed, isagoo xusay in taasi ay dhaawaceyso kalsoonida shacabka iyo sumcadda ciidamada.
Cali Fiqi ayaa tilmaamay in dadaallo badan oo lagu bixiyay dib u dhiska hay’adaha dowladda iyo ciidamada ay halis gali karaan haddii aan si taxaddar leh loo maareyn xaaladda.
Ugu dambeyn, wuxuu ugu baaqay Dowladda Federaalka inay dib uga fiirsato tallaabooyinka noocan oo kale ah, si loo ilaaliyo nidaamka federaalka loogana fogaado qalalaase siyaasadeed iyo mid amni.
