Wararka24: Dalal badan oo ka tirsan Yurub ayaa si cad u diiday codsi uga yimid dowladda Mareykanka oo ku saabsanaa in ay ka qeyb qaataan dadaallada lagu furayo marin-biyoodka Strait of Hormuz, kaddib xiisadda ka dhalatay dagaalka Iiraan.
Jarmalka ayaa si toos ah u sheegay in xaaladda taagan aysan ahayn “dagaal NATO leedahay,” isaga oo caddeeyay in uusan ka qeyb qaadan doonin wax howlgal militari ah, balse uu doorbidayo xal diblomaasiyadeed. Sidoo kale, Faransiiska iyo Spain ayaa meesha ka saaray inay ciidamo u diraan gobolka, halka Poland ay iyaduna diiday ka-qaybgalka howlgal kasta oo badeed.
Britain ayaa iyana sheegtay in aysan jirin qorshe howlgal NATO ah, inkastoo ay la shaqeynayso xulafadeeda si loo helo xal lagu soo celin karo isu-socodka maraakiibta iyo xasilloonida gobolka. Dalal kale sida Japan iyo Australia ayaa sidoo kale muujiyay ka-joogsi la mid ah.
Go’aamada dalalkan ayaa imaanaya xilli Iran ay xirtay marin-biyoodka Hormuz, oo ah meel muhiim u ah ganacsiga tamarta caalamka, taasoo keentay cabsi laga qabo in colaadda sii fido.
Kala duwanaanshaha mowqifyada Yurub ayaa muujinaya caga-jiid ku aaddan in si toos ah loogu lug yeesho dagaal cusub oo ka qarxa Bariga Dhexe.
