Qaar ka mid ah dadka sida dhow ula shaqeeya Madaxweynaha Mareykanka Donald Trump ayaa la sheegay inay muujinayaan qoomamo siyaasadeed oo la xiriirta dagaalka ka dhanka ah Iiraan, iyadoo ay jirto cabsi laga qabo in la dhayalsaday awoodda Tehran, sida lagu sheegay warbixin ay baahisay Axios.
Warbixinta ayaa xustay in saraakiil sare ay hore u muujiyeen shaki iyo baahi loo qabo waqti dheeri ah ka hor howlgalka milateri, balse Trump uu go’aansaday inuu sii wado qorshaha.
Ilo xog-ogaal ah ayaa sheegay in kalsoonida madaxweynaha ay sare u kacday kadib guulo milateri oo hore, taasoo keentay in uu aaminsanaado in Iiraan lagu wiiqi karo weerarro xaddidan.
Sidoo kale, warbixintu waxay tilmaantay in xaaladda Marinka Hormuz ay sii kordhisay cadaadiska, iyadoo laga digayo in dagaalku sii dheeraado oo ku fido gobolka. Saraakiil ka tirsan maamulka ayaa ka digay khataraha ka dhalan kara khalkhalka marinkaasi iyo suuragalnimada in Mareykanku kordhiyo awooddiisa milateri.
Dhanka kale, Aqalka Cad ayaa si adag u beeniyay warbixintaas, iyagoo sheegay in maamulka uu mideysan yahay isla markaana madaxweynuhu qaato go’aanno ku saleysan amniga qaranka.
Si kastaba, warbixino kale iyo ra’yi-ururin ayaa muujinaya hoos u dhac ku yimid taageerada dadweynaha ee howlgalka, iyadoo laga cabsi qabo in dagaalka daba dheeraada uu saameyn siyaasadeed ku yeesho Trump.
