Wararka24: Israa’iil ayaa toddobaadkan dowladda Mareykanka ku wargelisay in kaydkeeda gantaallada difaaca cirka ee riddada dheer uu ku dhow yahay gabaabsi, xilli uu sii xoogeysanayo dagaalka kala dhexeeya Iiraan, sida ay saraakiil Mareykan ah u sheegeen warbaahinta.
Wararka ayaa tilmaamaya in Israa’iil ay dagaalkan gashay iyadoo markii horeba ay hoos u dhaceen gantaallada difaaca ee ay haysatay, kadib isticmaal badan oo ka dhacay dagaalladii hore ee ay la gashay Iiraan.
Sidoo kale waxaa la sheegay in weerarada joogtada ah ee gantaallada Iiraan, oo qaarkood wata madaxyada qarxa ee badan, ay culays saareen nidaamyada difaaca cirka ee Israa’iil.
Si kastaba ha ahaatee, Wasiirka Arrimaha Dibadda Israa’iil Gideon Sa’ar ayaa beeniyay wararka sheegaya in dalkiisa uu wajahayo gabaabsi dhanka gantaallada difaaca ah.
Saraakiil Mareykan ah ayaa sheegay in Washington ay hore u ogeyd hoos u dhaca kaydka difaaca ee Israa’iil, balse ay xuseen in Mareykanka laftiisu uusan hadda wajahayn gabaabsi la mid ah.
Dhinaca kale, Pentagon-ka ayaa sheegay inuu kordhinayo wax-soo-saarka nidaamyada difaaca gantaallada, halka Aqalka Cad uu sheegay in kaydka hubka ee Mareykanka uu ku filan yahay fulinta hawlgallada milatari ee hadda socda.
Dagaalka u dhexeeya Israa’iil iyo Iiraan ayaa weli sii socda, iyadoo labada dhinac ay muujinayaan inay diyaar u yihiin dagaal sii socon kara muddo dheer.
