Wararka24: Hoggaamiyeyaasha Soomaaliya, Jabuuti iyo Itoobiya ayaa kulan saddex-geesood ah ku yeeshay magaalada Jabuuti, kaas oo diiradda lagu saaray xoojinta iskaashiga amniga, horumarinta dhaqaalaha iyo xasilloonida Geeska Afrika.
Kulanka waxaa ka qeyb galay Madaxweynaha Jamhuuriyadda Federaalka Soomaaliya Xasan Sheekh Maxamuud, Madaxweynaha Jamhuuriyadda Jabuuti Ismaaciil Cumar Geelle iyo Ra’iisul Wasaaraha Itoobiya Abiy Ahmed.
Saddexda hoggaamiye ayaa ka wada hadlay arrimaha amniga gobolka, la dagaallanka kooxaha argagixisada iyo dadaallada lagu xoojinayo xasilloonida Soomaaliya iyo guud ahaan Geeska Afrika.
Madaxda ayaa sidoo kale falanqeeyay sida loo kordhin karo iskaashiga dhaqaale ee dalalka gobolka, iyagoo ka hadlay fursadaha maalgashi, fududeynta isu-socodka ganacsiga iyo horumarinta kaabeyaasha dhaqaalaha si loo xoojiyo isdhexgalka dalalka deriska ah.
Madaxweyne Xasan Sheekh Maxamuud ayaa uga mahadceliyay dowladda iyo shacabka Jabuuti martigelinta kulankan, isagoo carrabka ku adkeeyay muhiimadda ay leedahay in la sii wado wada-tashiyada iyo iskaashiga u dhexeeya dalalka gobolka.
Kulankan ayaa kusoo aadaya xilli dalalka Geeska Afrika ay wajahayaan caqabado dhinaca amniga iyo horumarka ah, iyadoo hoggaamiyeyaashu ay ku heshiiyeen in la xoojiyo wada shaqeynta si loo gaaro xasillooni iyo horumar waara oo gobolka ah.
