Wararka24: Qaar ka mid ah darawallada mootooyinka bajaajta ee ka shaqeeya magaalada Muqdisho ayaa maanta dhigay dibadbax cabasho ah oo ay uga soo horjeedaan sare u kaca ku yimid qiimaha shidaalka.
Dibadbaxayaasha ayaa isugu soo baxay qaybo ka mid ah waddada Maka Al-Mukarrama, iyagoo xiray isgoyska KM4 oo ka mid ah meelaha ugu mashquulka badan caasimadda, taas oo saameyn ku yeelatay isku socodka gaadiidka iyo dadweynaha.
Darawallo la hadlay warbaahinta maxalliga ah ayaa sheegay in dibadbaxooda uu yahay mid nabadeed, isla markaana ay dalbanayaan in dowladda ay wax ka qabato sare u kaca qiimaha shidaalka ee ay ku eedeeyeen qaar ka mid ah ganacsatada.
Mid ka mid ah darawallada bajaajta ayaa sheegay in ay yihiin canshuur bixiyeyaal balse ay la kulmayaan culeys dhaqaale oo sii kordhaya, isagoo xusay in sare u kaca shidaalku uu si toos ah u saameeyay shaqadooda iyo noloshooda maalinlaha ah.
Qiimaha shidaalka ee Muqdisho ayaa si weyn u kordhay maalmahan, iyadoo warar ganacsi ay sheegayaan in halkii liitar ee baasiinka ah uu ka kacay qiyaastii $0.65 ilaa ku dhowaad $1.5, arrin la xiriirta saameynta xiisadaha ka taagan Bariga Dhexe ee ku yeeshay suuqyada tamarta.
