Wararka24: 5-02-2026 Xubno ka tirsan Golaha Samata-bixinta ee hore heshiiska ula gaaray Dowladda Federaalka Soomaaliya ayaa bayaan wadajir ah ku caddeeyay mowqifkooda ku aaddan ansixinta wax ka beddelka iyo dhameystirka Dastuurka Soomaaliya oo ay shalay cod aqlabiyad leh ku meel mariyeen Labada Aqal ee Baarlamaanka.
Xubnahan oo kala ah madaxweynihii hore ee Koonfur Galbeed Shariif Xasan Sheekh Aadan, ra’iisul wasaarihii hore ee Soomaaliya Cumar Cabdirashiid Cali Sharmarke iyo wasiirkii hore ee warfaafinta Danjire Daahir Maxamuud Geelle ayaa si weyn u soo dhaweeyay dhameystirka dastuurka, iyagoo u mahadceliyay Baarlamaanka Federaalka iyo Madaxweynaha Jamhuuriyadda Federaalka Soomaaliya Xasan Sheekh Maxamuud.
Bayaanka ay soo saareen ayaa lagu sheegay in tallaabada Baarlamaanka ay muujineyso biseyl siyaasadeed iyo dhowrista heshiisyadii qaran ee hore loo gaaray.
“Waxaan u aragnaa tallaabadan mid muujinaysa bisayl siyaasadeed, dhowrista heshiisyada qaran iyo xoojinta nidaamka dimuqraadiga ah ee ku dhisan wadatashi iyo isla xisaabtan,” ayaa lagu yiri bayaanka.
Xubnaha Golaha Samata-bixinta ayaa sidoo kale ku baaqay in dowladda ay sii waddo wadahadal iyo wada-tashi qaran oo furan oo lala yeesho kooxaha mucaaradka iyo dhammaan daneeyayaasha siyaasadeed si loo gaaro is-afgarad ku saabsan qodobada ay u arkaan inay u baahan yihiin dib-u-eegis dheeraad ah.
Waxay ugu dambeyn ugu baaqeen dhammaan dhinacyada siyaasadeed in ay ka hormariyaan danaha qaranka kala aragti duwanaanta, isla markaana ay ka shaqeeyaan xasilloonida siyaasadeed, midnimada qaranka iyo hirgelinta dastuur loo dhan yahay.
