MUQDISHO — Cali Cabdullaahi Cosoble oo ahaa madaxweynihii ugu horeeyay Hirshabelle ayaa ku baaqay in gobolka Hiiraan uu noqdo maamul goboleed u gaar ah.
Cosoble ayaa ka hadlay xiritaanka gogoshii wadatashiga qaran ee Muqdisho. Wuxuu sheegay in Hiiraan ay buuxisay shuruudaha maamul goboleed.
“Dastuurku Qur’aan maaha. Waxaan jeclaan lahaa in aan arko Hiiraan oo ah maamul goboleed gooni ah,” ayuu yiri Cosoble.
Madaxweynihii hore ayaa sheegay in Shabeellaha Dhexe ay sidoo kale xaq u leedahay inay noqoto maamul gaar ah. Wuxuu xusay in hal gobol oo buuxiya shuruudaha uu ku filnaan karo maamul goboleed.
Cosoble wuxuu ku eedeeyay dastuurka kumeel gaarka ah inuu u adeegayo dano gaar ah. “Waxaan horey u soo noqday madaxweyne goboleed, waana ogahay xaqiiqooyin badan,” ayuu intaa ku daray.
Wuxuu sheegay in haddii Hiiraan loo aqoonsado maamul madax bannaan ay keeni karto horumar cusub.
Tartan dhanka horumarka ah ayuu ku saadaaliyay inuu ka dhex bixi karo maamullo is jecel.
Baaqan ayaa ku soo beegmaya xilli muddo siddeed sano ah dadka Hiiraan ay ka muujinayeen dareen ka dhan ah nidaamka Hirshabelle. Dad badan ayaa taageersan in Hiiraan ay noqoto maamul madax bannaan.
